12 rumah panjai diasuh bekurung

Kluster Pasai majak ngerekai
KANOWIT: Bisi 12 buah rumah panjai di pelilih tu dipejalaika Atur Mindah Betagang (PKP) berindik ari pengerekai Kluster Pasai.
Ketuai Polis Pelilih Kanowit Supritendan Tega Bilong udah ngenukuka pekara tu lebuh dirandau Suara Sarawak ditu tadi.
Ku iya, entara rumah panjai nya Rumah Benjamin Angki di Rantau Kemiding, Rumah Jelani (Rantau Kemiding), Rumah Maria Tembaga (Matau, Machan), Rumah Tibu (Bukong, Jagoi), enggau Rumah Roma (Bukong, Jagoi).
“Udah nya Rumah Anthony Ikus (Pedai), Rumah Dim (Machan), Rumah Engkulau (Bukong, Jagoi), Rumah Katerina Kujat (Nanga Sah), Rumah Manggie (Machan), Rumah Samsudin (Machan) sereta Rumah Jelai (Nanga Tada).
“Semua rumah panjai tu bejalaika PKP nitihka hari bulan ke udah ditetapka ngagai peranak rumah panjai nya,” terang iya.
Tega madah, semua sida tu ditemu bisi kontak semak enggau Kluster Pasai.
Nya kebuah peranak dia ditagang ari mindah lalu rumah panjai nya dipinta bekurung kandang diatu, ku iya.

Suara Sarawak