13 kes baru positif Covid-19 di Sarawak nyengkaum siku anak mit

KUCHING: Siku anak mit lelaki peranak menua ti pulai ke Pusa, Betong entara 13 ari sida ti positif Covid-19 ti diripotka sehari tu.
Chairman Komiti Penyangga Penusah Nengeri Sarawak (JPBNS), Datuk Amar Douglas Uggah Embas madahka anak mit dirikodka kes import B laban diperesa pulai ari endur bisi kes Covid-19.
“Anak mit enggau enam iku diri sebilik pulai ari Johor ngagai Pusa ari Padang Bilun Entarabansa Senai ngagai Padang Bilun Sibu kena 26 Disember 2020.
“Datai ba Padang Bilun Sibu kena 26 Disember 2020 pengudah beperesa enggau sida sebilik, sida udah diasuh kuarantin ba rumah pengelama 14 hari enggau udah dilekat gelang jari,” ku iya ba aum pemberita Covid-19, ditu tadi.
Uggah ti mega Sapit Kepala Menteri madahka Sarawak ngerikod 13 kes positif Covid-19 ti ditemu ba Pelilih Kuching (lima kes), Miri (lima), Bintulu (dua) enggau siti kes di Pusa ngujungka kes positif nambah ngagai 1,161 kes.
“Ari 13 kes nya, 10 kes import iya nya lapan ari Semenanjung Malaysia sereta bela siti kes ari Indonesia enggau Sabah.
“Pia mega, dua iku nya kes berampit dalam menua sereta siti kes nya kontak kes positif Covid-19,” terang iya.
Ku Uggah, rayat Sarawak ti pulai ari luar Sarawak ba endur suntuk palan kuarantin dikemendar kuarantin ba rumah enggau dilekat gelang.
“Baka Kluster Mador, kami ngemendarka iya kuarantin ba rumah laban suntuk palan kuarantin ba Sibu.
“Tang igi penyakit tu ngerekai ketegal musin pengerami iya nya lebuh Hari Krismas.
Taja pia, iya madahka JPBN udah ngiga hotel bukai ba Sibu, Sarikei, Betong enggau Mukah nyadi palan kuarantin.