ARTIKEL

14 Pugu Manifesto GPS

Facebook
Twitter
LinkedIn
WhatsApp
Telegram

BINTULU: Bisi 14 semaya enggau komitmen dibantai nengah Manifesto Gempung Parti Sarawak (GPS) ti nyabung Iskandar Turkee ba Pengawa Bepilih Mit (PRK) Kunsil Nengeri (DUN) Jepak.

Lebuh mantaika manifesto nya, Sapit Premier Sarawak ti mega Direktor Operasyen GPS PRK DUN Jepak, Datuk Amar Awang Tengah Ali Hasan madah, manifesto nya juluk deka nentuka pengawa nampung pemansang infrastruktur enggau ekonomi rama ti ngangkat tikas pengidup peranak ditu.

“Nengah mandat ari rayat sereta pengundi di Jepak, GPS besemaya deka terus bejalaika mayuh agi inisiatif enggau projek pemansang dikena nambah pemujur, pengelantang sereta penyulut peranak di Jepak enggau selampur Sarawak.

“Kami besemaya sereta chakah bejalaika 14 pugu seraris enggau pemansang Sarawak ti nyadi wilayah maju bepenatai pemisi tinggi manggai ba taun 2030,” ku iya.

Awang Tengah mansutka jaku nya lebuh ngarika Premier ti mega Chairman GPS, Datuk Patinggi Tan Sri Abang Johari Tun Openg ba Pengawa Ngelanchar Manifesto GPS PRK DUN Jepak di sebuah hotel tebilang ditu, kemari.

Nerang silik, Awang Tengah ti mega Sapit Presiden Parti Pesaka Bumiputera Bersatu (PBB) madah, pugu ba manifesto nya baka nyamin penegap enggau pengering politik Sarawak, ngintu pesaka bansa enggau nyaga pengelikun Sarawak sereta ngangkat servis perintah ti sikar bepelasar ke integriti enggau atur perintah ti manah.

Kelimpah ari nya, nyendia infrastruktur pemun jalai alun, penyangkai kapal enggau padang bilun, ngerembaika bungkur enggau kualiti bekal ai sereta kuasa karan, tiang pemanchar sereta servis telekomunikasyen enggau Internet sereta ngubah sitak Jepak enggau ngemansang mengeri satelit Jepak.

Pugu bukai ngaku tanah hak adat bansa asal (NCR) enggau nampung pengawa nyukat tanah, nyendia rumah ulih dibeli ungkup rayat DUN N67 Jepak, nyendia mayuh agi skim pengentap baru enggau nangkir agi genturung pendiau, nyeleti rumah enggau bantu ngentak rumah panjai sereta ngemansang modal mensia nengah pelajar enggau latih teknikal vokasional ti bekualiti.

Berebak enggau nya, ngerembai akses sereta kualiti servis pengerai, ngeranchak pemansang sektor betanam betupi, kilang ngaga barang, servis, dagang temuai enggau industri kreatif dikena nyungkak ekonomi DUN N67 Jepak, nyendia infrastruktur, geran enggau akses makit sereta latih dagang ngagai raban orang dagang industri mit enggau jelan pemesai (IKS), pedagang sereta pedaja ba sitak DUN N67 Jepak, bejalaika polisi inklusif, ulih nitih jalai pengarap diri empu, ngemeran adat asal enggau pengelantang sosial sereta nentuka penyeretai aktif raban nembiak ba pemansang di Jepak.

“Manifesto GPS tu amat komprehensif, pragmatik sereta realistik, mungkur bemacham pengawa dikena nyaga hak enggau pengelantang rayat sereta ngemansang pemujur jemah ba sitak Jepak enggau Sarawak.

“Tu meh komitmen enggau juluk kitai. Tu ukai jaku sengapa baka ti digaga chalun bukai. “Kitai enda nanam tebu ba mulut tang deka nentuka semaya sereta komitmen ba manifesto tu dikereja enggau naka manah,” ku iya.

Bisi bela datai, Speaker DUN ti mega Chairman Mendam PBB, Tan Sri Datuk Amar Mohamad Asfia Awang Nassar, Sapit Premier ti mega Presiden Parti Rayat Sa’ati Sarawak (SUPP), Datuk Amar Dr Sim Kui Hian, Mandal Presiden Parti Rayat Sarawak (PRS), Datuk Wilson Ugak Kumbong, Mandal Presiden Kanan Parti Demokratik Progresif (PDP), Rolland Duat Jubin, Mandal Presiden PBB ti mega Sapit Direktor Operasyen GPS ba PRK DUN Jepak, Datuk Seri Stephen Rundi Utom enggau Tuai Indu PBB, Datuk Seri Fatimah Abdullah.

LAIN-LAIN BERITA

Lenyau mentor ti bepenau

KUCHING: Penau Tun Pehin Sri Abdul Taib Mahmud enggau bisi runding strategik mujur mai pemansang moden ngagai Sarawak. Menteri Industri Pemakai, Komoditi enggau Pemansang Wilayah

Projek ART Johor bechuntoka pemujur Sarawak

KUCHING: Sistem Transit Aliran Autonomi (ART) di Sarawak deka nyadi malin ungkup projek ART ti deka dipejalai di nengeri Johor. Perintah Nengeri Johor benung ngelanggur

Sarawak ngulit dua hari

KUCHING: Perintah Sarawak ngemendarka timpuh ngulit selampur nengeri pengelama dua hari, belabuh sehari tu enggau pagila. Nambah ke nya, tambai mega digitang tengan tiang aja

BERITA TERBARU

Lenyau mentor ti bepenau

KUCHING: Penau Tun Pehin Sri Abdul Taib Mahmud enggau bisi runding strategik mujur mai pemansang moden ngagai Sarawak. Menteri Industri Pemakai, Komoditi enggau Pemansang Wilayah