1,400 iku anak Sarawak dibantu Bank Rayat

KUCHING: Bank Rayat ngagihka RM140,000 belanja dikena mantu 1,400 iku nembiak sekula ba selampur Sarawak.

Ketuai Makit enggau Komunikasyen Bank Rayat Nizam Sani madahka tu sebengkah ari tanggungpengawa rama koporat (CSR) Bank Rayat nengah Program Bantu Besekula Yayasan Bank Rayat (YBR) ti dipejalaika ba selampur menua Malaysia.

“Pengawa tu seriris enggau pelin pengawa baru perintah iya nya Wawasan Kemakmuran Bersama (WKB) 2030, Matlamat Pemansang Lestari enggau Gerempung Bangsa-Bangsa Bersatu dalam nyendiaka pelajar ti bekualiti ngagai nembiak sekula.

“Nengah Program Bantu Besekula YBR tu RM140,000 deka diagih ngagai 14 pampang Bank Rayat di selampur Sarawak ke alai sebuah pampang nerima RM10,000.

“Ari nya, sida deka meri bantu ngagai 100 iku nembiak nengah Akaun Simpanan-i Nuri,” ku iya.

Nizam bejaku munyi nya maya aum pemberita Nyuaka Bantu Yayasan Bank Rayat ngagai Opis Pelajar Nengeri di sebuah hotel tebilang ditu, kemari.

Ku iya, nengah Akaun Simpanan-i Nuri tu YBR udah mantu RM1.47 juta belanja ngagai 14,700 iku nembiak ti dipilih ba selampur Malaysia.

“Pia mega, Bank Rayat bekerejasama enggau Opis Menteri Dagang (Med) ngatur Program Jom Pulai ke Sekula.

“Ba program tu, kami udah mantu urung 400 iku nembiak sekula di selampur menua meri perengka dikena sekula baka baju uniform, karung kaki (stoking), beg sekula enggau kasut.

“Bagi Sarawak, Program Jom Pulai ke Sekula deka diatur kena 30 Disember tu ila,” ku iya.

Kelimpah ari nya, iya madahka bantu ti diberi tu dikeandal ulih ngelempungka tating apai indai B40 ari sukut belanja perengka sekula tu deka bepun taun baru tu ila.

“Kami mega, ngarapka bala nembiak ulih ngetanka pemujur pemandai ba akedemik sereta nambahka pengerindu sida deka nurun ke sekula taun baru.

“YBR enggau Bank Rayat mega deka mantu nembiak ti datai ari ruang bilik mimit penatai pemisi ngulihka pemakai ti bernutrisyen ti dikumbai Nuri Nutrisyen.

“Kami udah ngelangkar urung 200 program dikena mantu 20,000 nembiak ti kurang penatai pemisi ngulihka pemakai ti bernutrisyen tu,” ku iya.

Sama bisi datai Ketuai Pemantu Direktor Opis Pelajar Nengeri Jaya Uki, Direktor Bank Rayat Wilayah Sabah enggau Sarawak Mohamad Shiblie Abg Sapuan enggau Menijar Besai Bank Rayat Norashikin Shaharudin.