144 genturung pendiau udah nerima surat pala tanah NCR

KUCHING: Gerempung Bansa Dayak Bidayuh (DBNA) udah mujur nyaup nyukat Tanah Adat Bansa Asal (NCR) ba 144 genturung pendiau.

Menteri Pendidikan, Sains enggau Pansik Teknologi Datuk Seri Michael Manyin Jawong madah, pengawa nya udah dipejalai kenyau ari taun 2007 suba.

“Aku begulai enggau bala ketuai raban bansa Bidayuh bukai ngatur randau enggau Kepala Menteri Datuk Patinggi Abang Johari Tun Openg dalam bulan November taun nyin tadi berandauka pengawa ngaga pala tanah NCR tu.

“Berindik ari aum nya, Kepala Menteri udah ngerah piak bekuasa bekaul kelebih agi Direktor Opis Tanah enggau Survei (JTS) ngatur pala tanah NCR ti dipejalaika DBNA,” ku iya ke mega Ketuai Penyanding Penemu DBNA.

Iya mansutka jaku nya lebuh dirandau pemberita pengudah Gempuru Makai Taun Baru 2020 enggau Genap Taun Ke-65 DBNA ba Dewan Serbaguna DBNA ditu, malam tadi.

Ku iya, piak sida ngarapka sebagi ari pala tanah NCR ulih dikeluar dalam bulan June taun tu.

“Penyampau genturung pendiau ti disukat ngambika diberi pala tanah tu bisi 340 lalu udah mujur nyukat tanah urung 140 genturung pendiau,” terang iya.

Berebak enggau nya, Kepala Menteri mega muji pengawa dipejalaika raban DBNA bekaul enggau pekara NCR enggau pengawa bukai dikena ngemansangka komuniti Bidayuh.

Suara Sarawak