SAMARAHAN: Bisi 145,000 peluang kereja baru enggau begaji besai disadang ulih ditumbuh entara 2021 ngagai 2030 berindik ari ubah pemansang ekonomi di Sarawak kelebih agi ekonomi baru baka Ekonomi Digital, Hidrogen, Ekonomi Biru enggau Gadung.
Sapit Premier Sarawak, Datuk Amar Awang Tengah Ali Hasan madah, nya nipakka inisiatif Perintah Sarawak ngamatka juluk menua maju datai ba taun 2030 nengah Strategi Pemansang Sarawak Pengudah COVID-19 2030 (PCDS2030).
“Tu mega meri peluang ngagai graduet di Sarawak bulih kereja ke deka nyungkak pemansang ekonomi ba menua tu nengah ekonomi baru.
“Nya kebuah, aku meransang semua graduet terus nyikap diri enggau pengelandik sereta penemu diguna ngambi besemekih ba makit kereja.
“Kebuah pia laban industri tu chukup mayuh enggau begunaka pengereja landik sereta ulih nelebaka diri enggau ubah teknologi sereta peminta rampa menua, bungkur rama enggau Tatakelola (ESG),” ku iya.
Awang Tengah mansutka jaku nya lebuh bejadi Eksibisyen Kereja enggau Bakat (TRACE) 2023 ti diatur di Dewan Tun Abdul Rahman (DeTAR) Universiti Malaysia Sarawak (UNIMAS), ditu kemari.
Teks jaku Awang Tengah dibacha Tuai Sekretari Politik Premier Sarawak, Fazzrudin Abdul Rahman.
Berebak enggau nya, Awang Tengah minta palan pelajar tinggi (IPT) bekerejasama enggau sektor peribit nentuka nembiak disikap mayuh penemu sebedau masuk makit kereja.
Iya mega madah, kerejasama kededua sektor baka ngemansang program enggau latih ti engkeman enggau industri ulih nyukung pemansang di Sarawak.
“Aku pechaya nengah kerejasama ti rat agi entara IPT enggau pemain industri ulih nentuka anak Sarawak disikap pengelandik enggau penemu masuk makit kereja.
“Kebuah pia laban dikena ngemansang Sarawak, raban peribit mega beempu tanggungpengawa nyadi ejen pemansang,” ku iya.
Bekaul program TRACE 2030, Awang Tengah andalka pelasar baka eksibisyen kereja nya ulih nambahka pengelaku graduet di Sarawak.
Ba program nya, sebengkah pengawa nyain Sempekat Pemereti Ati (MoU) diatur entara UNIMAS enggau Kaunsil Pemansang Industri Sekuriti (SIDC).
Ba pengawa nyain sempekat nya, UNIMAS diarika Mandal Chanselor, Profesor Datuk Dr Mohammad Kadim Suaidi, Sapit Mandal Chanselor Pengawa Mansik enggau Inovasyen, Profesor Dr Wan Hashim Wan Ibrahim, Dekan Fakulti Ekonomi dan Perniagaan, Profesor Dr Rossazana Ab Rahim seraya SIDC diarika Tuai Pegawai Eksekutif SIDC, Tengku Zarina Tengku Chik.
