SRI AMAN: Sepenyampau 1,482 iku nembiak beumur 16 enggau 17 taun di Bagi Menua Sri Aman udah divaksin dos keterubah.
Kepala Menteri Datuk Patinggi Abang Johari Tun Openg madahka nembiak ke beumur 16 enggau 17 taun dia berengkah divaksin kena 8 September tu tadi.
“Program meri vaksin Covid-19 ngagai nembiak beumur 16 enggau 17 taun benung chakah dipejalaika ba semua bagi menua di Sarawak.
“Di Bagi Menua Sri Aman tu, penyampau nembiak ke beumur 16 enggau 17 taun bisi 2,179 iku iya nya nembiak ari tujuh buah sekula sekondari,” ku iya.
Abang Johari bejaku munyi nya ba aum media pengudah ngabas Palan Meri Vaksin di Balai Suarah Sri Aman ditu, kemari.
Ku iya, di serata Sarawak penyampau nembiak beumur 16 enggau 17 taun bisi 289,200 iku.
“Perintah andalka semua nembiak beumur 16 enggau 17 taun tu ila tembu divaksin sebedau sekula dibuka kena 3 Oktober ti deka datai.
“Udah nya, kitai deka ngatur pengawa meri vaksin ngagai nembiak beumur 12 ngagai 15 taun nangkan ke tu.
“Enti ulih pengawa tu patut tembu ba ujung bulan Oktober iya nya naka 22 ngagai 26 Oktober,” ku iya.
Berebak enggau nya, iya meri besai terima kasih ngagai raban lutur, raban pemesai Opis Menteri Pengerai enggau raban Opis Pengerai Bagi Menua Sri Aman laban udah bebendar ngemujurka pengawa meri vaksin ngagai nembiak tu.
“Enti udah divaksin, perintah andalka bala nembiak ulih dilindung enggau ulih belajar betimpai mua.
“Nengeri kitai, menua keterubah ti bejalaika program tu lalu naka diatu semua bagi menua benung chakah bejalaika pengawa nya.
“Aku andalka ba ujung taun tu, kitai ulih nyapai imuniti beraban,” ku iya.
Sama bisi datai Sapit Kepala Menteri Datuk Amar Douglas Uggah Embas, Menteri Kaunsil Kandang Menua enggau Pengawa Berumah
Datuk Sri Prof Sim Kui Hian, Menteri Muda Pengintu Pendiau enggau Pengelantang Komuniti Datuk Francis Harden Hollis enggau bala bukai.
