15 komiti PKN deka ditambah

KUCHING: Sepenyampau 15 Komiti Parlimen Pemansang Komuniti Menua (PKN) baru deka ditumbuh enda lama agi dikena nambahka 16 komiti ke bisi ba Sarawak diatu.

Ketuai Pemadah PKN Sarawak, Leslley Kalom madah, penumbuh PKN nya seriris enggau Polisi Komuniti Menua dipenyadi Menteri Kaunsil Kandang Menua enggau Pengawa Berumah Zuraida Kamaruddin taun nyin kemari.

“Diatu, bisi 16 Komiti PKN ba Sarawak iya nya Petra Jaya, Santubong, Kota Samarahan, Batang Sadong, Stampin, Miri, Lubok Antu, Bintulu, Tanjong Manis, Kapit, Sarikei, Betong, Puncak Borneo, Saratok, Sibu enggau Igan.

“Baka nengeri bukai, kitai ba Sarawak mujur numbuhka 16 Komiti PKN lalu deka nambah 15 komiti udah tu,” terang iya.

Ku Leslly, juluk enggau fokus asal PKN ari pun penumbuh deka mantu raban orang tusah baka raban B40, raban seranta ba mengeri enggau raban diselinting ke dirintai dalam Polisi Komuniti Menua.

“Fokus PKN iya nya nyadi sebuah Gerempung Ukai Dikuasa Perintah (NGO) ngambi ngemansangka ekonomi, pekara rama, pelajar enggau ngenegapka ‘jati diri’ ba komuniti diatu.

“Naka diatu bisi 198 Komiti Parlimen Pemansang PKN udah ditumbuh ba selampur menua enggau penyampau komiti tu nitihka sitak Parlimen,” terang iya.

Berebak enggau nya, PKN diatu manggai 300,000 kaban ba selampur menua.

Kenyau ari ditumbuh dalam taun 2018, PKN udah mujur ngempung mayuh NGO enggau digempung di baruh atur ke fokus enggau strategik agi.