15,000 peranak Bau udah rejister betuchuk vaksin

BAU: Lebih 15,000 iku peranak ba Pelilih Bau udah rejister betuchuk vaksin Covid-19, pia ku Adun Tasik Biru Datuk Henry Harry Jinep.

Ku iya, program nya nerima timbal ke chukup manah lalu ngarapka mayuh agi orang rejister nerima vaksin pechuma ungkup pengelantang begulai.

“Bau ngembuan urung 62,000 iku peranak lalu kami nagit 40,000 iku deka rejister nerima vaksin laban sekeda ari sida engka milih betuchuk vaksin ba Kuching tauka nengah opis sida empu.

“Nya alai, anang irau pasal pengawa betuchuk vaksin tu taja kitai meda mayuh timbal negatif ari mensia mayuh ba media rama laban vaksin nya beguna amat ungkup pengerai tubuh mensia.

“Menteri Besai Tan Sri Muhyiddin Yassin mega udah betuchuk vaksin Covid-19 kena Hari Tiga tu tadi lalu Kepala Menteri Datuk Patinggi Abang Johari Tun Openg disadang nerima vaksin nya kena Hari Enam tu,” terang Henry.

Henry mansutka jaku nya ba aum pemberita Program Nyadung Sengkabung Mua ba sitak Bau di Pasar Tasik Biru, ditu kemari.

Iya mega madahka diri deka betuchuk vaksin Covid-19 nya kena Hari Enam tu di Klinik Pengerai Singai, Bau begulai enggau Adun Serembu, Miro Simuh enggau Pegawai Pelilih Bau, Aniella Siam.

Ngelansa pasal program nya, Henry madahka nya sebagi ari kimpin meri penyedar ngagai mensia mayuh pasal pemesai guna vaksin ngambi nyaga diri kelimpah nagang pengerekai Covid-19.

Program nya diatur Opis Menteri Kaunsil Kandang Menua enggau Pengawa Berumah (KPKT) Malaysia enggau kerejasama Palan Servis Tasik Biru lalu urung 500 kutak sengkabung mua udah disadung ngagai mensia mayuh.

Pengari KPKT Voon Shiak Ni madahka tuju bukai program tu laban deka bekunsika penerang ngagai mensia mayuh pasal pemesai guna vaksin lalu nya mih chara kitai mukaska igi penyakit tu.

“Kami mega udah mai volunteer ti udah dituchuk vaksin Covid-19 ngambi bekunsika peneleba sida sereta meri penyedar ngagai peranak ditu,” ku Shiak Ni.

Ungkup rikod, kena 21 Februari tu tadi, Sapit Kepala Menteri Datuk Amar Douglas Uggah Embas madahka Perintah Sarawak diatu nerima nama sida ti deka rejister betuchuk vaksin Covid-19 bansa Pfizer- BioNTech nengah Opis Pelilih enggau klinik pengerai.

Kelimpah ari nya ku Uggah, rayat Sarawak mega ulih rejister nengah aplikasyen MySejahtera lalu madahka Ketuai Genturung Pendiau sereta Tuai Rumah benung bekerejasama enggau Opis Pelilih sereta klinik pengerai dalam pengawa nya.

Suara Sarawak