KUCHING: Pelilih Menua Kuching sehari tu terus ngerikodka kes positif baru Covid-19 pemadu mayuh iya nya 184 kes ari 461 kes positif baru ti dirikodka.
Komiti Penyangga Penusah Nengeri (JPBN) dalam siti penerang media kemari madahka nya ngujungka penyampau kes positif ketegal Covid-19 di menua tu nambah ngagai 73,318 kes.
Kelimpah Pelilih Menua Kuching, pelilih menua bukai ti ngerikodka kes positif baru kemari iya nya Simunjan (30), Bintulu (29), Dalat (29), Sarikei (28), Sibu (28) enggau ke bukai.
Tandu penerang nya, ari 461 kes baru ti dirikodka tu 77 bisi nunjukka kelai dirampit Covid-19 lebuh beperesa ke alai 289 kes ditemu ari orang ti ngembuan kaul ngagai pesakit sebedau tu.
Nangkan ke nya, penerang tu madahka bisi tiga kes pemati dirikodka ngujungka penyampau kes pemati ketegal Covid-19 di menua tu nambah ngagai 453 iku.
Kes pemati tu dirikodka ba Sibu enggau Bintulu ngaul dua iku indu enggau siku lelaki ke beumur entara 59 ngagai 91 taun.
Sida tiga ti midang tu mega bisi ngembuan penyakit bukai baka penyakit kemi manis, tinggi darah enggau penyakit jantung.
Dalam penerang ti sama, bisi empat kluster Covid-19 ditukuka punas iya nya Kluster Sungai Parik Sri Aman, Kluster Banting Sri Aman, Kluster Melatai Kapit enggau Kluster Jalan Baru Tatau-Bintulu Tatau.
Taja pia, siti kluster baru dirikodka iya nya Kluster Jalai Pesisir Jalai Bintulu-Miri Bintulu ngaul sebuah palan gawa ladang sawit ke benung bejalaika Atur Mindah Betegang Bepekul (PKPD).
Senetang pekara bukai, penerang tu madahka Unit Pekara Pengarap Bukai (Unifor) udah ngemas Atur Pengawa Standard (SOP) bagi Pelin Ngemanahka Menua (PPN) Renggat Kedua.
Ku penerang tu, penerang pemadu baru bekaul Unifor tau digiga ba (https://jkm.sarawak.gov.my/modules/web/pages.php?mod=download&menu_id=0&sub_id=363) ke alai SOP tu berengkah dikena 24 Julai tu.
