20 gilin diesel dirampas

SIBU: Siku lelaki deriba pikap ditan Raban Polis Marin (PPM) Wilayah 5 Sibu dipelaba ngemai diesel ngena chara belalai ditu, kemari.

Komander iya, ASP Shamsol Kassim madahka saspek dipadah ngemai 400 liter diesel berega RM70,872 ti udah diisi ke dalam gilin diengkah ba tanju pikap nya.

“Operasyen disereta tujuh pemesai enggau kaban Unit Risikan PPM W5 Sibu udah ngetan siku lelaki peranak menua tu lalu meresa sebuah pikap urung pukul 8.45 pagi Hari Lima ba Jalai Helang ditu.

“Pengudah diperesa, entukar nya ditemu mai 20 gilin dipelaba ngundan diesel urung 400 liter,” terang iya.

Nitih ku Shamsol, lelaki nya puntan mantaika sebarang bukti meli tauka dokumen bekaul enggau pemendar mai minyak nya.

“Saspek ditan laban dipelaba ngereja penyalah di baruh Akta Kawalan Bekalan 1961 ketegal ngembuan barang dijaga enggau nadai pemendar,” ku iya madah nyemetak.

Ku iya, entukar nya mega udah dirampas begulai enggau diesel nyadika barang kes enggau bukti.

Kes tu mega udah diserah ngagai Opis Menteri Dagang Dalam Menua enggau Pekara Bebeli Barang (KPDNHEP) Sibu ngambika atur bukai dipejalai.