20 taun ngumpul keresa lama

BETONG: Pengerindu meda keresa lama ngujungka Edmund Rintai ngumpul mayuh koleksyen bemacham keresa lama.

Lebuh dirandau, Edmund madahka diri, urung 20 taun udah ngemeranka pengawa ngumpul keresa lama ti bekaul enggau adat lama bansa Iban.

Entara keresa ke digumpul iya baka baju taya, tumpa pirak, tikai burit, kain kebat sereta mayuh agi ke bukai.

“Aku dah chakah dalam kandang lima taun… berengkah kitai bisi media rama baka Facebook.

“Kereban lama tu digumpul aku ari orang ke endang agi bisi nyimpan kereban lama tu,” ku iya nerang.

TIRU TAUKA UKAI… Edmund mandangka chara sida China kelia nunjukka kereban nya digaga ari pirak tauka ukai.

Ku iya, siti ari kebuah iya rindu ngumpul keresa lama tu ketegal ari bala nembiak ke mayuh nanya pasal nya ngagai iya.

“Mayuh bala nembiak ngerandau aku ba Facebook ke rindu pasal ngepan enggau pekara tu.

“Nembiak baka ari universiti tauka ari Palan Pematih Pengajar (IPG) endang terus ‘inbox’ aku dalam media rama ketegal beguna ke nya dalam pengawa pelajar,” ku iya madah.

Nya alai ku Edmund, ari nya iya berunding kereban nya mayuh diguna bala nembiak, lalu nama kebuah iya enda ngumpul sereta ngaga koleksyen kediri.

“Aku kala dikangau bejaku pasal ngepan ba IPG Miri kelimpah ari Universiti Malaysia Sarawak (Unimas) lalu bisi mega sekeda nembiak Pom Enam datai ngagai rumah aku empu meda koleksyen tu,” ku iya nerang.

Pua tekalong

Edmund mega madah bisi sekeda ari kereban nya endang enggi iya empu lalu sekeda nya enggi orang tang diadu ke iya ngambika manah agi dipeda.

Siti ari koleksyen ke pemadu nyelai sereta dikerindu orang ke meda koleksyen Edmund iya nya buk mensia dikumbai buk chemara.

“Buk tu diempu indai tuai berumur 60 taun ari menua tu.

“Kelia, buk orang indu chukup panjai lalu lebuh nyau beuban, nya alai buk chelum tu kena sida ngelalai ke uban nya,” ku iya nerang.

Ku iya, bida buk nya, enti buk ke diengkah ba duku, nya tanda iya buk munsuh tang ketegal buk nya enda diengkah ba duku, nya alai buk nya semina buk biasa aja.

Mayuh pekayan lama ke berumur lebih seratus taun nyadi koleksyen Edmund.

Siti ari pekayan ke narit ati iya nya baju taya.

“Baju taya tu kelia dikena orang lebuh sida nurun ngayau.

“Baju tu dikena sida ngelindung diri ari kena pantap lebuh ngayau,” ku iya seraya madah baju nya ti digaga ari taya.

Iya mega madahka baju taya nya diulih iya ari siku orang berumur 80 taun.

“Nyadi orang ke alai aku ngambi tu uchu iya, orang ke endang ngempu tu aki ngagai orang tu tadi,” ku iya nusi pengelama baju nya.

Meruan manah dipeda, baju taja ti dipandangka Edmund ba eksibisyen Simposium Ngepan Iban (SNI) 2019 sembuan tubuh siku lelaki ke baru angkat bujang.

Kelimpah ari nya mega, Edmund mandangka gaya pua ke kena orang kelia ti digaga ari kulit tekalong.

“Kelia nadai pua baka kitai diatu, nya alai sida semina bekenaka pua ari kulit kayu.

“Pua tu endang udah bisi sebedau perintah Jipun ngeruga menua kitai suba,” ku iya nusi.

Nangkan nya, Edmund madah gari ke nyadi koleksyen iya nya endang ukai dikena besehari tang lebuh bisi pengerami sereta Gawai laban kelia chara ngaga mar.