KUCHING: Opis Menteri Pengerai mantai pengeran deka nyapai 100 peratus intu pengawa beputung enggau anestesia ti likun manggai taun 2030 di Sabah enggau Sarawak.
Menteri Pengerai Malaysia (KKM), Dr Zaliha Mustafa madah, naka diatu peratus ungkup dua bengkah chara berubat tu agi tikas 75 peratus.
“Ba jaku aku tadi, diatu tikas pengelikun intu pengawa beputung enggau anestesia agi ba tikas 75 peratus.
“Aku andal manggai taun 2030 tauka sekeda taun ti deka datai kitai ulih nyapai tikas ngagai 100 peratus.
“Ba pekara tu kami ukai semina deka nambah lutur pakar beputung kulit (ungkup kes kulit betu) tang merambu deka nambah penyampau lutur pakar beputung ba semua bansa kes dikena ngemanah ke servis.
“Nya alai, manggai taun 2030 kitai andal lebih 20,000 iku lutur pakar beputung ulih dijapai.
“Senentang pekara tu, pengawa ti deka diadu endang meri perati ngagai pengawa ngelatih raban lutur ti bisi ati nyadi lutur pakar ba opis menteri,” ku iya.
Zaliha nibar jaku nya rambau aum pemberita pengudah bejadika Gempuru Beputung Dunya ti Keterubah (The New Dawn) di sebuah hotel tebilang, ditu tadi.
