200kg lukan laku tiga hari

Pengangkun Dayang nyadi batang pengawa

KUCHING: Taja napi pemar ngelaban ujan enggau panas ninting hari bedaja tisi jalai alun tang ketegal pengangkun ngasuh Dayang Engkas, 30 taun, enda mudah mantul ati.

Indai dua anak tu madahka iya ngepunka pengawa bedaja lukan kenyau ari taun 2009, enda jauh ari Jalai Dato Mohd Musa, Kota Samarahan.

“Lebuh nya aku semina bejual lukan aja sebedau nambahka dagang diri bejualka tekuyung apong, belungkin enggau ketam.

“Lukan ti dijual ulih aku ngiga kediri ba Sungai Segitin Sebayur lalu bisi sekeda diangkat aku ari orang bukai,” ku iya.

Ku Dayang, dalam sekali iya ngangkat lukan manggai 200kg lalu abis dijual kandang tiga hari nitihka pemayuh orang ti meli.

REJEKI… Bangsal tisi jalai endur Dayang bedaja lukan.

Kelimpah ari lukan, iya mega bisi ngangkat tekuyung apong enggau belungkin urung 30kg sekali ngangkat.

“Lukan ke dijual aku enda ngena timbang kilo tang ditumpuk aku nitihka rega RM15, RM10 enggau RM5.

“Tekuyung apong enggau belungkin dijual RM7 sekilo,” ku iya madah ngagai Suara Sarawak lebuh dirandau.

Nangkan nya, mensia mayuh ke mansa endur iya bedaja suah ngetu meli utai ke bisi dijual iya lalu jam pemadu kiruh maya ujung minggu, ku Dayang.

“Hari orang gawa nadai entu mayuh orang meli enda baka ujung minggu laban ujung minggu awak endur mensia mayuh mindah bebelika lauk.

BELUNGKIN… Entara pemakai ke bisi dijual Dayang dikena ngemayuhka bansa utai dagang diri.

“Asil ari pengawa kami duai laki aku bejual bisi dikena bebayarka rumah, bil karan enggau ai sereta belanja dapur bukai,” ku Dayang seraya nambah, bedaja tu udah nyadi batang pengawa seduai laki bini dikena beridup.

Rindu amat bedaja ku Dayang laban pupu bansa ke datai meli utai daja iya, tebal agi bansa Iban.

“Ari pengawa tu mega aku mayuh bulih bakih, sida ke datai ngelawa bangsal aku bedaja endang semampai ngundang, meli seraya berandau.

“Mayuh mega penemu dikunsi sida, jerita ke nyadi besehari sehari. Rindu amat enti bisi bala bakih endang ngetu semina deka ngerandau aku, nanyaka rita pangan diri.

“Rindu bebakih enggau sida, nadai ngira umur, bansa enggau pengarap, semua sida kemerah ngerandau kitai, enda keji,” ku Dayang madahka peneleba diri sepanjai bedaja.


NYAMAI… Kuyung Apong mega bisi dijual Dayang ti nerima mayuh peminta.

Iya berengkah bejual ari pukul 9 pagi nyentuk 5 lemai lalu bisi maya ngetu tumu laban utai daja laku kelebih agi ujung minggu.

Ku Dayang, urung sejam iya nyikap diri baka numpuk lukan, nusun mija enggau ngatur endur iya bedaja.

“Taja bejual lukan tu baka gaya ai, bisi pasang surut, tang aku tetap angkunka pengawa dagang kelimpah besaup ngiga belanja ungkup kami sebilik.

“Aku ngarapka dagang lukan tu terus maju, mansang sereta mujur,” ku iya nyimpul randau.

BATANG PENGAWA… Dayang ngarap dagang lukan iya seruran maju.

 

BATANG PENGAWA… Dayang ngarap dagang lukan iya seruran maju.

 

PEMILIH… Lukan dijual Dayang ditumpuk nitihka rega RM5, RM10 enggau RM15.

 

PEMILIH… Lukan dijual Dayang ditumpuk nitihka rega RM5, RM10 enggau RM15.