KUCHING: Raban Nembiak Skim Skrang (BSS) ngembuan juluk ti besai ari Program Futsal Nembiak Trofi Yb Dr Johnical Rayong Ngipa Renggat Ke-3.
 
Presiden BSS, Jimbun Rangkong madah sida ngembuan juluk deka ngatur pekit futsal besai agi dudi hari iya nya tebuka ngagai nembiak ari pelilih Sri Aman, Betong, Saratok enggau Lubok Antu.
 
“Kitai deka meda program futsal tu richah agi jemah ila. Nyema bisi peluang, kami BBS deka ngerembaika pekit futsal tu ngagai selampur Sarawak.
 
“Nya alai, arapka kaban BSS terus beserakup ngereja pengawa nengah program ke baka tu awakka ulih nyadi chunto ngagai raban nembiak ari menua bukai,” ku iya.

Jimbun (kiba) maya pengawa nyuaka keretas kereja program ngagai Dr Johnical Rayong (dua kanan) bekaul enggau program futsal ke deka diatur BSS ujung bulan tu.

 
Jimbun madah munyi nya nengah sebengkah penerang ke dianjung nuju Suara Sarawak, apin lama ke udah.
 
Nangkan nya, Jimbun madah raban BSS ngereja pengawa bepelasarka rambai jaku ‘Rebak Baru Tungkat Pemansang Menua’ ti mai reti ke chukup besai ba pendiau pengidup sida lebih agi ba Skim Skrang.
 
Munyi ku sempama ‘baka wi tampung tali, baka rutan tampung danan, sema pechah periuk tanah, deka kami ganti enggau periuk tani, parai sida ke tuai ganti tubuh kami.
 
Arapka semua nembiak ba selampur menua bela besaup nyura pemansang menua Sarawak,” ku iya nerang enggau nyemetak.
 
Ngelansa pasal program futsal ke deka diatur BSS kena 30-31 tu, Jimbun madah bisi disedia taba endur bejual sereta eksibisyen ari opis-opis perintah lalu nembiak sekula ke besemak endang diperansang datai sampal meri sukung.