PSB enda sepenemu enggau prinsip GPS

KUCHING: Pemutus PSB N nerima kaban parlimen GPS enggau ex-pengari rayat PRS nyemilik sida baka ngelesei sereta bemunsuh enggau GPS.

Raban Nembiak GPS nengah penerang berita ditu kemari madah, taja dua ADUN (PSB), Dato Sri Wong Soon Koh enggau Datuk Jerip Susil megai portfolio dalam kabinet perintah, PSB tu ukai siti ari komponen parti GPS, lalu ngaga pemutus ti chukup berani nerima MP GPS enggau dua ex-ketuai PRS ke dalam parti nya.

“Ba sentang pekara disiplin, kitai enda ulih ngenggaika pekara bisi kaban ukai GPS dalam kabinet ngasaika semua pengelebih enggau nerima agih belanja dalam Perintah GPS.

“Seraya parti politik ukai GPS, ngambi kaban ari GPS, niat nyaga ngeruga penegap enggau penyerakup GPS dalam parti komponen.”

Penerang berita dibacha Sapit Ketuai Nembiak PBB Miro Simuh ba Indu Opis PBB, kemari.

ENDA SEPENEMU : Miro (duduk, dua kanan) begulai enggau nembiak GPS ke bukai ba aum media ke diatur ba Kuching kemari.

Ku Miro, penetap penemu GPS belalauka penyerakup enggau kerejasama rat antara parti komponen, kelimpah ngempung rayat Sarawak begulai gawa ngambika Sarawak menyana agi dudi hari.

“Ba penemu kami, parti ti baru ditumbuh enda sepenemu enggau prinsip GPS.

“Nyelai amat sekeda bala kaban enda ngasika penetap penemu GPS mega nyadi kaban eksekutif Perintah Nengeri kitai.

“Kami pechayaka pemintar runding Kepala Menteri mutarka isu tu pulaika pemaik Sarawak lalu kami raban Nembiak GPS nyukung tegut penemu Kepala Menteri sentang pekara tu,” ku iya.

GPS dilempaika rayat Sarawak enggau tanggungpengawa negika hak enggau penuduk Sarawak dalam MA63, GPS mega enda ulih ngemendarka sebarang politik ti ngeruga pengawa ditegika perintah.

“Sarawak begunaka politik sepenemu belalauka pekara menua ti teguh enggau keran nyaga hak enggau pemerat Sarawak, ukai pelasar ti ngasuh pambar, tang ngempung pengawa ditegika Sarawak.

“Nya kebuah GPS nyadi semina siti aja gempung politik tumbuh ari menua tu ti bisi peneleba enggau pengering ngembing Sarawak enggau rayat iya nuju menua ti menyana,” ku iya.

Raban Nembiak GPS mega nyemetak madahka sida bediri tegap ngetan enggau napi sebarang ulah ti nguji ngerusak enggau mambarka komuniti Sarawak ti diau dalam pemaik.