ENGKILILI: Menua Sarawak chukup tebilang enggau pemayuh rumah panjai. Dataika bansa ari menua seberai mega, enti sema besebutka nama Sarawak, tentu sida terunding baka ni pendiau rumah panjai?

Enti dibandingka kelia enggau ke diatu, kitai Iban sigi agi diau ba rumah panjai. Pengidup diau ba rumah panjai tu tau ngerapat agi kaul enggau diri sebilik, suku juru sereta mega kaban belayan ke bukai.

Tang diatu, jarang kitai meda rumah panjai ke agi bisi digaga ngena kayu, tebal agi rumah panjai diatu didiri ngena tiang besi sereta bedinding ngena simen enggau batu nitih ke pemansang kelebuh hari.

Engkilili, siti pelilih menua ke dipegai bagi menua Sri Aman, agi tubah Iban ke mengkang diau ba rumah panjai kayu.

Siti rumah panjai ba Batang Lemanak iya nya rumah panjai Serubah Ulu agi beridup diau ba rumah panjai kayu.

KALA NYADI PALAN DITAPATKA TEMUAI

Rumah Panjai Serubah Ulu tembu lalu ulih alai diau ba taun 2000. Sebedau sida ke beempu rumah panjai tu angkat mindah itu, menua Serubah Ulu tu datai ari siti rumah panjai ti dikelala ngena nama Serubah.

Bepun ari taun 2000, rumah panjai Serubah bebagi dua ianya Serubah Ili enggau Serubah Ulu.

Kebuah pia, kenu ku siku peranak menua nya, Nani Mang, 58 taun, rumah panjai Serubah Ulu lebuh nya agi deka neruska pengawa nerima temuai ari menua tasik datai nemuai ke rumah panjai sida.

Nya alai lebuh peranak Serubah Ulu ngentak rumah panjai tu, sida mengkang berumah ngena rumah kayu lalu sida ba Serubah Ili berumah panjai batu.

Pengawa nerima temuai ari menua tasik tu dikemeran sida beempu menua tu kenyau ari taun 1980, ianya lebuh sida agi betampung ba siti rumah panjai Serubah.

RUAI.. Ruai rumah panjai Serubah Ulu ke digaga ngena kayu tebelian sereta bedindingka buluh.

Kelia, jalai alun apin bisi, semina jalai ai aja. Lalu bala temuai ari menua tasik ke apin kala nepan perau nujah Batang Lemanak chukup rinduka pengawa baka tu.

“Kelia, enti enda salah ingat aku, lebuh temuai ka ke rumah panjai, sida nganti ari semak jembatan Batang Lemanak. Lebuh nya asai ke agi RM40 tambang siku,” kenu ku Nani.

Pengudah pengawa nerima temuai tu mindah ngagai Serubah Ulu, pengawa ngambi temuai tu mengkang dikemeranka sida ba rumah panjai nya. Nyadi tu nambah ke penatai pemisi bala ke diau ba rumah panjai nya.

Siku ari orang ti suah enggau pengawa nerima penatai temuai ba rumah panjai, Lenta Umar, 44 taun, madahka pemeri ke diberi temuai ngagai sida nya nitihka pemeri bala temuai empu.

“Lebuh temuai datai nemuai kitu suba, mayuh macham pengawa digaga kami dikena ngerindang sida. Enti baka pagi, bala sida temuai dibai bejalai meda pendam lama ditu, ngetan ke peti’, manjuk ba babas lalu bisi mega pengawa ngetan ke bubu.”

RUMAH TUAN

Ba sepiak rumah panjai nya bisi digaga sida rumah siti alai bala temuai ari menua tasik bemalam ke dikumbai sida Rumah Tuan.

Kebuah rumah nya dikumbai sida Rumah Tuan laban bala temuai ari menua tasik tu sigi dikangau ‘Tuan’ magang. Rumah nya mega digaga ngambika bala temuai ngasaika chara idup ba rumah panjai.

“Enti lebuh malam, bala ke landik ngajat sereta betabuh mandangka main asal kitai nya ngagai sida. lebuh nya mega sida diasuh nguji asai tuak ke digaga ba rumah panjai nya empu.”

“Kelimpah ari nya, lebuh makai, sida temuai tu diasuh nguji makai lauk kitai rumah panjai baka daun jabang enggau manuk pansuh,” ku Lenta.

PALAN NGAGA FILEM ‘KANANG ANAK LANGKAU

Rumah panjai Serubah Ulu tu ukai semina nyadi palan dilawa bala temuai bemalam ari menua tasik, tang mega ari menua tu empu. Rumah panjai Serubah Ulu mega kala nyadi endur ngaga drama, filem sereta mega iklan.

Entara iya, iya nya drama “Kenyalang, I’m in love” enggau filem “Kanang Anak Langkau” . Tu patut nyadi peransang ngagai bala sida ke bempu menua tu awak ke rumah panjai sida tau nyadi alai ti sukut enggau pengawa dagang temuai.

RUMAH TUAN.. Pintu penama rumah alai temuai diau.

Taja pia, pangka pemansang dunya dia pengawa nerima temuai tu maki nyau makin kurang dikemeran ba rumah panjai tu ketegal peranak rumah panjai nyau bela kiruh ngereja pengawa diri empu sereta bisi pengawa bukai lebih meri untung. Bepun ari taun 2015 kenya, sida nyau kurang agi nerima penatai temuai.

Pia mega, sida serumah ngasai penatai bala temuai nadai tentu meri asil ke mayuh, lebih agi enggau ekonomi menua kitai ke enda berapa manah.

Lenta mega nambah, enti kelia pengawa nerima temuai endang bisi meri nambah pemisi sida. Tang diatu, bala temuai agi meri pemeri baka ke suba lalu nya nadai bisi meri penguntung ba sida.

TEMUAI SEMINA DATAI PULAI HARI

“Diatu agi bisi temuai datai nemuai ke rumah panjai. Tang enda suah baka suba lalu sida pen nadai bemalam baka suba. Temuai semina datai nemuai pulai hari aja. Udah nya sida lalu ke ulu agi, nemuai ngagai rumah panjai ke agi bisi nerima sida bemalam.” ku Lenta.

Pengudah bala temuai dipeda kurang nemuai ngagai rumah panjai Serubah Ulu, sida ke diau ba rumah panjai tu semina nyual asil bekebun dikena beridup nupi diri sebilik. Bisi mega sekeda nembiak bekuli ke luar mengeri dikena mantu nambahka penatai pemisi apai indai sida ba rumah panjai.

Lenta Umar