Kerejasama rat palan pelajar enggau ejensi perintah bekaul ba pengawa nempa modal mensia ngembuan pengelandik dikena meransang pengerembai dagang enggau ekonomi menua kelebih agi ngaul raban indu endang beguna amat.

Kebuah pia, pengerapit kaul kerejasama tu deka nentuka tuju enggau juluk nempa raban gawa bepengelandik tinggi deka ulih dijapai nipak tagit Perintah Nengeri Sarawak nyadi sebengkah nengeri bepenatai pemisi tinggi datai ba taun 2030.

Nangkup peminta tu, SG Academy, sebengkah palan pelajar peribit nyendiaka kelas ngajar pengelandik dalam bidang kulinari tauka mela pemakai ngena chara ti meruan sereta nitihka standard antarabansa.

MANTU RABAN INDU

Nengah kaul kerejasama enggau Opis Pemansang Pengelandik (JPK) di baruh Opis Menteri Pengatur Pengereja enggau Perbadanan Sumber Manusia Berhad (PSMB), sida udah ngatur kus kulinari ungkup raban indai tunggal enggau raban indu ti datai ari ruang bilik seranta enggau nadai penatai pemisi meruan.

Nitih ku Direktor Wilayah Sarawak SG Education Group, Novert Sullang madah, palan sida endang keran nyikap raban diselinting nya ngena pemandai bebelaka pemakai baka ngaga kuih ngambika ulih dijual sida.

“Tu mega dikumbai kami siti ari dagang industri pemakai lalu tuju kami ngambika sida ulih ngangkatka tikas pengidup sereta pansut ari pekuh penyeranta kelimpah ngemansangka diri empu.”

KEREJASAMA ENGGAU JWKS

NGIRI PENEMU: Pematih nerang pasal chara ngaga kuih rambau kus diatur ba Wisma Wanita Training Centre apin lama ke udah.

“Program tauka kus tu dipejalai di baruh Opis Raban Indu enggau Ruang Bilik (JWKS) di baruh pegai Opis Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit.

“Kus diatur ninting Hari Tiga enggau Hari Empat bepalan ba Wisma Wanita Training Centre, Semariang lalu kus tu dipejalai nadai bebayar,” ku Novert nerang silik.

Ku Novert ti mega Ketuai Pemesai Eksekutif SG Academy, ba Sarawak, bisi ditatak penyampau tubuh sida ti ngulu kus berapi enggau ngaga kuih laban bisi penekul ba pekara belanja enggau kereban dikena ngatur pengawa enti kus nya dipejalai sebengkah raban tauka ejensi aja.

Nya alai, nengah kaul kerejasama tu, raban diselinting ulih diembing ngulu siti kus ti diatur begulai setipak enggau pengawa nyikap sida ngena pemintar runding ngidupka diri sereta nemu enggau ngelala pengulih ni bagi bansa pemakai ti nangkup peminta makit tauka dagang ti ulih dikerembai.

“Sida tu deka dilatih ngena penemu enggau pengelandik ti ngasi lalu ulih dikemeranka sida ba pengidup besehari sehari nyengkaum pengawa dagang pengudah sida mujur nembuka latih.

“Kitai endang andal amat tuju enggau juluk kus tu deka dijapai lalu meri pemaik ngagai raban diselinting,” ku Novert lebuh dirandau pengarang berita apin lama ke udah.

NANGKUP PEMINTA BIDANG KULINARI

ASIL BELAJAR: Bala nembiak Penyediaan & Pembuatan Makanan Tahap 3 rambau peresa ba taun kepenudi sida belajar ba palan nya.

Ngelansa pasal SG Academy, palan pelajar tu udah ditumbuh dalam taun 2016 ba Sarawak dikena nangkup peminta dalam bidang kulinari.

Sebedau tu, peranak Sarawak kelebih agi raban nembiak ti deka nampung pelajar dalam bidang tu napi pemar laban semina bisi disedia ba Semenanjung aja.

Berindik ari inisiatif raban SG Academy empu ti berati enggau sinuka penusah ditapi sida ti keran belajarka bidang tu ngujungka palan tu mujur ditumbuh ditu lalu udah nerima timbal chukup manah.

Program pelajar disediaka palan tu udah diaku gempung antarabansa baka baka Vocational Training Charitable Trust (VTCT) ari United Kingdom (UK), City & Guilds UK, TAFE South Australia sereta WINTEC New Zealand lalu udah nerima ISO 9001:2015 Quality Management System.

Entara program tauka kus bisi disediaka baka Penyediaan & Pembuatan Makanan Tahap 2 (9 bulan); Penyediaan & Pembuatan Makanan Tahap 3 (12 bulan) enggau Diploma in Professional Cookery Studies ari VTCT UK (12 bulan).

SERIRIS ENGGAU PEMANSANG JEMAN DIGITAL

Ku Novert, nyerumba pemansang dunya majak nguing ngagai jeman digital enggau Revolusyen Industri 4.0 (IR4.0), sida mega bisi nyendiaka kus baka Drone Technology: Precision In Agriculture; 3D Augmented Reality; Project Management, Industrial Internet of Things (IIoT): Smart Manufacturing enggau STEM Education in Drone Technology ti diungkup ngagai raban nembiak.

“Tu mega dikena nentuka raban sida ti diau ba Sarawak enggau Sabah enda dikelaung lalu terus tinggal ari arus pemansang dunya,” ku Novert nyimpul jaku diri.