SIBU: Daya idup kitai Iban mayuh bepanggai ba utai tumbuh enggau utai idup dalam kampung tauka babas.

Sebansa utai tumbuh ti suah dipeda tauka dikena kitai Iban ba rumah panjai maya begawai enggau ngereja pengawa bukai iya nya buluh.

Nitih ku penemu ari peneleba Tuai Rumah Akul Dagang, Sungai Belalang, Salim Sibu, buluh tu sebansa ari utai tumbuh ti bisi lubang dalam batang ke dikumbai ruas lalu entara sepemanjai lubang dalam batang buluh besapatka buku.

“Bisi mega utai tumbuh ke bukai ke bisi lubang dalam batang ke dikumbai enterekup. Tang ba jaku Iban enterekup tu ukai dikumbai buluh,” ku iya.

GALAK: Gaya penumbuh buluh ti ditanam ba kebun ti ayung lalu tubu iya manis amat.

Iya madahka mayuh bansa buluh ti bisi tumbuh ba kampung, batang suah diambi kena ngaga bubu, geladak enggau dinding langkau umai sereta kereban gawa bukai kelimpah sumbuk muda tauka tubu diambi ke lauk.

Buluh mega beguna amat maya nirika gawai tauka miring. Bila buluh ti udah diraut digagaka teresang endur manggaika piring.

Bila buluh mega suah dianyam baka baka endur nepu piring ti digitang ba tengah nalan umai maya pengawa manggul tauka nanam sengkenyang kelimpah ruas dikena mansuh enggau ngelulun engkayu enggau manduk asi pulut.

Semua pengawa tu dikereja enda ngelaungka buluh laban senang digiga sebelah tisi umai lalu pengawa rumpas dikereja. Bisi mega bansa buluh ditanam kena ngelagu tisi tauka ba laman rumah baka ti suah dipeda ba kandang mengeri.

MACHAM GUNA: Bila buluh ti udah dibelah deka dianyam betuchung endur nepu piring lalu dikait enggau digitang ba batang buluh ba tengah umai maya manggul.

Tambah mega batang buluh tu lempung disan, muntang dibelah enggau nadai mayuh leman sereta nadai begunaka mayuh macham kereban ngintu iya, chukup ngena duku enggau lungga aja.

“Buluh tu bisi bemacham bansa enggau nama nitihka pemesai, guna enggau gaya langkar iya tumbuh nyumbuk. Buluh tau tumbuh galak ba kampung tauka tisi rumah sereta ulih ditanam.

“Kitai bisi urung 49 bansa buluh ba dunya lalu semina buluh Munti, Payan, Balui, Aur, Muntat, Lalang enggau buluh Bala entara buluh ti suah dikena kitai. Buluh bala tu nyelai agi ari buluh bukai, ke alai batang bechura kuning.

“Nyadi buluh Muntat tu buluh ke nadai ruas ti mayuh tumbuh galak ba menua kitai ditu. Suah mega kitai meda orang bejual sebelah kaki lima ba pasar ti madahka buluh Muntat tu tau ke ubat,” ku iya ngelansa.

Nampung lansa bansa buluh dikumbai Lalang ku iya, buluh tu tumbuh ba tinting ti nadai utai ngayung enggau ngelindung lalu kena panchar mata panas.

PEMAKAI RUMAH PANJAI: Tubu tada ti suah dambi ke lauk enggau dijual ba sebelah tamu ujung minggu.

“Buluh Lalang tu tan enggau kering agi ari ke tumbuh ba emperan, ayong lalu lindung panchar mata panas.”

“Buluh Lalang tu mega enda dempa bubuk, nya kebuah orang selalu ngena buluh Lalang tu ngaga engkeratung, tungkin, temilah, bungkan, jerungkan, mata peti, laja, semilu, kesuling enggau mayuh utai bukai.”

“Enti udah lama dikirai, buluh tu deka kering amat sereta tajam enti digagaka laja, mata peti enggau jerungkan,” lansa iya.

Nangkan nya ku iya, dulu menya sida ke tuai ti deka nurun ngasu suah agi ngemai sumpit enggau laja. Jarang amat bisi senapang patah. Tambah mega sumpit enggau laja tu rumpas dibai.

 

“Utai ke dikumbai jerungkan iya nya buluh ke udah dikirai lalu dilancham, diujak ngelingi rumah lalu orang ke nerubuk deka tama ke rumah enda beradat enggau bisi niat enda manah tauka munsuh deka kena achuk buluh nya,” ku iya ngelansa silik.

Berindik ari nya, buluh tu bisi reti chukup besai ba pengidup kitai Iban kenyau ari kelia lalu agi ditampung ngagai rebak baru kelebih agi ba rumah panjai.

“Bala uchu ichit endang diajar aku ngelala ni bagi bansa buluh, tubu ti tau diempa, chara mela, guna buluh ke bukai sereta penti pemali maya nebang tuaka mantap tubu.

“Nitih ku tangkan sida ke tuai, indu ti datai kain enda disagi ngambi, mela enggau nasak tubu. Kebuah pia, nangika tubu betukar chura nyadi mansau.

“Pia mega maya ngulihka tubu, enda tau disipak tauka ditumpu nangika tubu deka luchuk tauka tasal. Buluh mega enda tau ditebang ngapa, meseti beselap nangika kena miang buluh enggau bejimat laban ujung buluh ti ditebang nya tajam,” ku iya nyimpul randau.

PEMANGGAI: Piring ti udah genap diadu deka dipanggai ba teresang digaga ari buluh.

w

CHUKUP NYAMAI: Pansuh enggau asi pulut dipanduk dalam ruas entara pemakai kitai Iban maya bisi pengawa ba umai baka beduruk maya nugal enggau ngetau.

 

 

PENGINGAT: Tuai Rumah Akul Dagang (bediri kanan) ngulu pengawa ke tanju tauka Sandau Hari Chairman Kaunsil Pelilih Menua Pesisir Sibu (SRDC) Sempurai Petrus Ngelai (duduk, tengah) ba Salim Belalang, Sibu