KUCHING: Ngemeranka pengawa betupi endang ulih mansutka asil ti manah kelimpah ngisi awak lepa pengudah pinchin gawa, ku Lawrance Clement Ahsay, 58 taun.

Pinchin gawa nyadi pengajar ke alai Lawrance enda nyangka pengangkun iya betupi nadai ngira bansa manuk mujur mansutka asil manah amat seraya bekunsika penemu enggau peneleba diasaika iya ngintu manuk nya begulai enggau bala bakih.

“Siti aja pengilap aku laban nadai merambu belanja enggau langkar pengawa ti meruan lebuh ngepunka pengawa nupi manuk baka manuk karan, manuk kampung, manuk penakan, manuk kuluk enggau ansa sereta manuk sabung.

“Nya kebuah aku enda nemu baka ni ka madah berapa penyampau puku, untung beresi ari dagang manuk tupi tu.

Rega sum enggau pemakai endang nadai kala dikira, pia mega penyampau untung ti udah diulih.

“Ba aku empu, asal tepantup ati meda jelu tupi meruan makai, chukup intu, gerai sereta besai nitihka patut udah chukup. Enti bisi rugi, kira nyadika lalau dudi hari,” ku iya ti ngajar ba SMK Penrissen No 1 sebedau pinchin.

Ngelansa pasal pengawa nupi macham bansa manuk, urung 4000 iku kesemua manuk ditupi iya ba menua, Kampung Serasot, Bau lalu iya berundang ari rumah ngelawa kebun ninting hari.

“Ba rumah aku diatu, bisi dua inkubator, sarah endur ngengkahka telu manuk ti deka diperam lalu mechah nyadi anak manuk.

“Tu ditempa ari jari aku empu, ari perati enggau meda kereban ditempa orang bukai.

“Incubator tu digaga dua ringkat. Ba ringkat baruh ai dalam bisin sedang pemesai tauka nitihka pemesai incubator.

“Tuju ai tu ngambika telu enda kelalu rangkai sereta nyemelaka pengangat dalam incubator nya.

“Ringkat kedua endur telu ti udah chukup hari endur mechah seraya ringkat ketiga endur engkah telu ti diperam. Pengangat ari panchar lampu 100 darjah Celsius dikena meram telu dataika telu mechah,” ku iya.

Ku Lawrance, timpuh telu manuk mechah 21 hari pengudah diperam, manuk kuluk begunaka 28 hari endur mechah seraya telu ansa manggai 30 hari endur mechah. Manuk berengkah betelu pengudah manggai umur lapan bulan.
Naka diatu, Lawrance nadai nerima sebarang bantu tauka skim ari ejensi bekaul, semua belanja enggau atur pengawa endang bepanggai ba diri empu.

Nya kebuah iya ngandalka diri deka nerima bantu tauka skim nitihka pematut ari ejensi tauka opis ngaul pengawa betanam betupi.

Nitihka penerang ari Lawrance, kelimpah ari nyual manuk idup berega RM14 sekilo enggau manuk dagin ti udah disayat tauka dibela berega RM18 sekilo, iya mega bisi nyual manuk kuluk idup ke lelaki berega RM150 siku enggau ke indu berega RM100 siku.

Rega manuk tu jauh mudah ari rega ba makit laban iya deka nyual abis manuk kuluk tu lalu belabuh nupi manuk penakan enggau manuk kampung aja udah tu. Iya mega bisi nyual anak manuk lelaki enggau indu.

Ketegal ati taluk, semua pengawa lempung magang dikereja ku iya kelimpah saup ari anak lelaki enggau orang digaji iya ngibun enggau ngintu manuk sereta bemalam ba kebun.

“Aku mega rinduka pengawa bekunsika penemu. Barang sapa bisi ati deka nemu enggau betanya silik sentang pengawa nupi manuk tu tau ngelawa aku ba rumah di Batu 9 ditu tauka telefon nuju lumur 016-8989724.

“Penatai bala kita endang diterima enggau ati lantang seraya kitai ngerapitka tanggam kaul begulai enggau pangan diri,” ku iya nyimpul randau.

TALUK: Lawrance endang ngasika pengawa nupi manuk sabung kenyau ari bujang menya

RINDU MEDA: Anak manuk ditupi dalam sangkar diberi makai enggau ai irup ti chukup

NERIMA PEMINTA TINGGI… Manuk kuluk ti bisi iya ditupi ba rumah iya di Batu 9 Kuching ditu.

PENGAWA BADAS : Lawrence (kiba) begulai enggau bakih iya, Victor, lebuh bejalai ngusung iya ke rumah ba Batu 9 di Kuching ditu.

CHUKUP ANGAT : Telu manuk kampung, manuk penakan, telu ansa enggau telu manuk kuluk diperam ngena panchar lampu 100 darjah Celsius.

BISI AI : Ringkat baruh endur engkah bisin ai, Ringkat dua endur manuk mechah