SIBU: Kitai ke nguan rumah meseti ransing meresi kandang rumah dikena nyeliahka penyadi sakit denggi, ku lalau Tuai Rumah Anthony Philip di Bawang Assan pengudah nguluka bala nembiak iya ngemujurka Kimpin Ngemunaska Dengi, apin lama ke udah.

Ba program tu, sida serumah 59 pintu enda betinggal besaup pangan diri ngemujurka pengawa sehari nya.

Sida besaup meresi sereta ngumpul uras ba kandang rumah.

“Kami serumah udah baum sentang pengawa beripai tu sebedau kami besaup nentuka pengawa tu mujur datai ba tuju,” pia ku TR Anthony madah ngagai pengarang berita, apin lama ke udah.

Iya mega madah, sida serumah udah sepenemu setujuka pengawa beripai baka nya deka dikereja tiga kali dalam kandang setaun.

Sepenembu pengawa beripai nya, sida serumah belelak sereta beserumpu makai.
TR Anthony madahka diri temegah ati laban peranak rumah panjai iya meri kerejasama ke manah sekumbang pengawa beripai nya diatur.

GIGA MANAH: Bala nembiak Rumah Anthony ngelingi kandang rumah panjai ngumpul uras.

MESETI BERESI SERETA LIKUN: Kerejasama ke manah antara pangan diri ngemujurka agi pengawa sehari nya.

IDUP BEPENGERAI SERETA LIKUN: TR Anthony (enam kanan) enggau bala iya sepenembu pengawa beripai.