Mayuh batang tuju pengawa dikereja bansa Iban ngambi idup diayung, diberekat, diibun sereta likun nguan menua sereta maya bejalai mindah kelebih agi jeman menua benung siga bekayau menya.

Ku penemu Lenggang Nuing, 48 taun, tu sebagi ari pengawa dikemeran Iban dulu menya iya nya berayah diungkup ngagai bala bujang berani ti nadai pungkang nurun ngayau, sekalika mungkal tauka malas serang sereta kayau anak.

Pemesai Waran Dua (B) Lenggang madah, berayah tu sama reti ngerandang tauka ngerandang jalai maya Gawai Burung didiri, siti agi gawai besai kitai Iban ba rumah panjai.

“Taja diatu jarang amat Gawai Burung tu didiri ti mungkur pengawa berayah, tang penerang pasal gawai tu patut ditampung ngagai rebak baru ngambika enda punas ngapa.

“Sida ke berayah meseti chukup ngepan enggau pekayan laban pengawa berayah tu mih alai sida ngeluluka diri bebunuh ngelaban munsuh.

“Nya kebuah sida ke berayah megai duku ilang, pedang tauka nyabur ngena jari kanan lalu jari kiba deka megai bungai papan tauka bulu papan ti dikelulu nyadi terabai maya iya berayah ngajat meling ranyai tauka pandung ti dikelulu nyadi munsuh,” ku Lenggang nerang silik.

Nangkan nya ku Lenggang, maya berayah tubuh kitai enda tau kena kepit ranyai enggau bungai papan, enggaika nadai jalai rari tauka besilat ngelaban munsuh.

“Reti nya, ranyai meseti dipeling kitai ngelaban pusin jam awakka tubuh kitai enggau ranyai (munsuh) beantaraka bungai papan (terabai),” ku iya.

Berayah tu mega dikena nikika Lemambang enggau orang ti ngirup Jalong lemai hari sebedau hari nyadi Gawai Antu, ku peranak asal Mujok Julau nampung.

“Pengawa berayah deka berengkah ari ujung tauka punjung ramu tauka ari jalai nganjung antu niti rumah panjai besundang tiga kali.

“Maya berayah tu, dia sida Lemambang digendang ngena gendang rayah tujuh (7) renggat. Lalu sida dilanggar orang beempu bilik sepemanjai rumah ngena ai tuak tauka ai bisa bukai.

“Munyi dipadah tadi, sida tu deka nangkin duku, selapuk tunjang lalu Lemambang ngena baju deka nimang genap malam Gawai Antu,” ku iya.

Ku Lenggang, orang tuai rayah tu iya nya orang ti ngirup jalung ke tuai antu lalu di tangkanka urang bukai.
“Maya orang ngirup jalung diserumba Lemambang berayah niti ruai dia bala bukai enda tau bejalai meraka mua sida enggai ka dipangka arung lalu luput.

“Laban maya nya ‘Yang’ bisi datai ngarung sida bujang berani ti ngereja pengawa besai maya Gawai Antu tu.
“Bisi mega aku kala ninga sida ke tuai nyebut pasal Ngajat Berayah, sebansa ajat asal sida ke lelaki.

“Ajat tu suah dibantai pengudah pengawa miring tembu, ke alai bala bujang berani deka ngajar ngelingi teresang diserumba enggau pangkung tawak enggau keranding besi.

“Berau kuning deka ditabur enggau munsuh disumpah maya Ngajat Berayah tu, manuk deka disayat enggau ditunu ba tanju lalu dinah ba mua mayuh ti bisi datai ngulu pengawa sida serumah,” ku iya nyimpul randau.

NGIRUP JALONG: Bujang berani ngirup ai jalong ti udah ditimang bala lemambang lebuhka berayah. – Gambar pemeri John Adam Gilbert.

BESUNDANG: Bala lemambang berayah niti ruai ari punjung setak ke setak besundang tiga kali. – Gambar pemeri John Adam Gilbert.

NIMANG: Lemambang benung nyadaka leka timang ngagai ai jalong ti deka diirup bujang berani Iban. – Gambar pemeri John Adam Gilbert.

AGI REGAS: PW2 (B) Lenggang Nuing

KERING: Entara pekayan mandangka bujang berani Iban nurun ngayau kelia.