SIBU: Rindu meda pemanah tengkebang jari bala bakih sebelah ruai raban media rama ngasuh ati Mary Ainie, 42 taun, gagit nengkebang asil ari pengelandik jari diri empu.

Ku iya, taja tu pengawa dikereja maya lepa tang dalam sehari enda tau enda ditegu, nemu ngasuh lelenggau, enda betah.

“Taja nadai mayuh leman pengawa baka betenun enggau ngebat, tang berasai amat enti udah duduk entap maya nyulam, pedis punggung bai kelalu lama duduk lalu pala mega tau sebingau.

“Nyau pemuas nyulam nunda enggau nyerumba bala bakih, enda berasai datai ba adan ga pengawa. Tepantup amat ati meda asil jari diri laban endang angkunka asil pengelandik jari,” ku peranak asal ari Sebauh, Bintulu.

Ketegal angkunka pengawa nyulam tu ku Mary, sida sebuat udah numbuhka siti raban nengah aplikasyen Whatsapp ti nyadi pelasar sida bekunsi enggau beduaka penemu begulai enggau pangan diri.

Sida sebuat mega suah bebagika penemu enggau langkar tengkebang baru ngambika bisi ditunda. Bisi mega sekeda nengkebang bungai sulam baru ari buah runding diri lalu dikunsi.

“Siti pemanah kami sebuat dalam raban nya enda rangka penemu enggau nadai ngembuan ati kepapas meda pemujur enggau penyulut bala bukai.

“Kami naka ulih bekunsika penemu, ni naka dikemisi endang dibagi bela, nadai bechiping enggau bepilih bulu,” ku Mary temegah meda serakup ati sida sebakih.
Nangkan nya ku Mary, ati ransing agi nyulum ari peransang apai tuai iya empu kelimpah ari bala bakih enggau sida sebilik.

“Maya meda penyampat enggau penyikar bakih nembuka sulam sida, ati kitai meda deka ransing agi. Tambah mega peransang ari bala diri nyengkaum raban indu Serakup Dayak Sarawak (PEDAS) Sibu.

“Ukai reti deka mekit tang laban teperansang meda pemanah tengkebang enggau tempa jadi sida lalu kami suah begelumu maya lepa ujung minggu serayaka bebakih enggau nanggam teguh kaul,” ku Mary madah nyemetak.

Iya madahka diri suah nyulam selampai, set kain enggau baju sulam sereta kain sulam nitihka peminta sida ti ngudal lalu mayuh udah udal tembu digaga iya nitihka timpuh taja nadai kala ngulu sebarang kus tauka seminar pengelandik jari tang ketegal pengangkun.

“Aku belajar enggau nunda ari chunto gambar ti dikunsi bala bakih dalam Whatsapp enggau Facebook. Bisi mega aku nunda langkar bungai bukai dikalih aku nyadi bungai sulam baka bungai tenun, kain kebat enggau ke bukai.”

Ku Mary, asil kraf jari mega ulih mansutka belanja ari sida ti ngudal sulam nyengkaum sida ti mayar pupuk. Tuju kitai ukai dekaka duit aja tang pekara ti beguna amat, ati tepantup enggau asil nya.

“Asil sulam kitai tu mega ulih dijual laban bisi peminta tinggi. Tu ulih nambahka penatai pemisi ba ruang bilik kitai lalu ulih nyaup apai tuai ngiga belanja,” ku iya.

MOTIF ASAL: Asil sulam Mary ti chukup alus sereta chura manding dipeda

MOTIF ASAL: Asil sulam Mary ti chukup alus sereta chura manding dipeda

NGISI AWAK LEPA: Mary kiruh nembuka sulam ti diudal orang.

RINDU MEDA: Antara asil sulam jari Mary ti nerima mayuh peminta naka diatu.

TEMEGAH: Entara ngepan asal dipandangka bala kaban PEDAS Sibu nyengkaum selampai sulam.