Ba pemutus SPM ke dibantai kemari Nazmi ari SM Sains Kuching Utara mujur bulih 9A +

KUCHING: Kaul enggau Tuhan, berekat sukung ari apai indai, pengajar sereta bala kaban nyadi peransang penyulut ba peresa Sijil Peperiksaan Malaysia (SPM) 2018.

Nazmi bin Ahmad Nizar ari Sekula Sekondari (SM) Sains Kuching Utara, Padawan madah, nya siti ari kebuah iya tau bulih pemutus 9A+ ba pemutus peresa SPM iya.

“Belajar sereta ngaga kereja sekula nitinting hari nya siti chara aku belajar lebuh deka ngambi peresa SPM.”

GAGA.. Julia mantaika pemutus peresa ngagai indai iya.

“Mayuh chara ulih dikena kitai maya belajar, kitai semina patut nemu milih ni bagi chara ke ngena ba kitai, sereta patut nemu nyaga ulah kitai, nya pemadu penting ti mai pemujur aku baka ke sehari tu,” ku Nazmi.

Iya madahka diri deka ngiga biasiswa ti ulih nulung iya nampung pelajar ngagai menua tasik laban iya bisi ati deka nampung pelajar iya ba bidang injinir mekanikal.

Indai Nazmi, Siti Zanariah Ahmad Ishak, ti mega nyadi siku pengelicha siti palan pelajar tinggi menua Sarawak madah diri chukup gaga lebuh meda anak bulih pemutus peresa ti manah baka nya.

“Pemujur tu mandangka asil ari pengawa betaun pengelama lalu lebih agi ari anak aku empu ti udah bebendar belajar.”

“Belajar sereta ngaga kereja sekula nitinting hari nya siti chara aku belajar lebuh deka ngambi peresa SPM.”

“Enda tinggal mega ngagai bala pengajar sekula ti chukup komited enggau bala nembiak diajar sida, sereta mega isi bilik kami empu ti enda putus meri sukung moral ngagai Nazmi,” ku Zanariah mantaika pengaga ati iya.

Bulih 9A+ 1A dalam peresa SPM 2018, Julia Liew ari SMK Green Road enda nyangka diri empu bulih pemutus peresa ti chukup manah.

“Asaika mimpi meda pemutus peresa aku baka nya laban aku ukai siku ari nembiak ti pandai ba kelas.”

“Anang mejal diri empu belajar datai tengah malam sereta chukup rehat nya pemadu penting lebuh deka ngambi peresa,” ku iya.

TERIMA KASIH… Nazmi disium apai enggau indai sereta mantaika pemutus peresa ti chukup manah tanda terima kasih ke sukung enggau ajar seduai.

Julia madah pemar diasai lebuh belajar iya nya enda ulih nagang diri megai telefon binching laban nya nyau nyadi ulah bala nembiak kemaya ari.

Indai Julia, Choong Chooi Har mega madah chukup gaga anak iya tau bulih pemutus peresa ti manah baka nya.

“Ba rumah iya baka nembiak bukai, jarang meda iya belajar bebendar, suah agi meda iya meda televisyen.”

“Tang sehari tu, amai enda nyangka iya tau bulih pemutus ti chukup manah,” ku Choong.