KUCHING: Bansa asal kelebih agi Iban dulu menya endang pechayaka munyi burung dikena nentuka nasit siku orang ti ninga iya lalu mayuh macham burung diasika kitai bansa baka burung bumai, burung kena bejalai, burung kena ngasu, burung kena nyabung, burung kena ngambi manang, beliau enggau Lemambang.

Bekunsika jerita ditampung ari sida ke tuai, Sang Sanjan, 40 taun, peranak Rh Linggie Layang Nanga Sikit Ulu Kakus, Tatau, Bintulu madahka kitai bansa asal menua tu pechayaka munyi burung kelimpah ari kenyap mimpi sebedau ngepunka sekeda pengawa kelebih agi pengawa bumai betaun, ngasu, berikan enggau ke bukai.

“Ari tu meh penatai pengarap beburung ba pengidup sida aki ini menya. Kenu ku sida niang aki, Petara ngena munyi burung dikena iya nguasa pengidup mensia.

“Kelimpah ari Lang Sengalang Burung, ti nyadika pun pengarap lama kitai, bisi tujuh iku burung bukai ti besai amat reti dalam sistem pengarap lama.

MINTA TELA: Miring begawai maya Gawai Burung tauka Gawai Kenyalang didiri peranak rumah panjai ti agi ngibun enggau ngemeranka pengarap lama.

“Tujuh burung tu iya nya Ketupung, Beragai, Bejampung, Pangkas tauka Kutok, Embuas, Papau tauka Kelabu enggau Nendak.

“Kesemua tujuh bansa burung tu nyadi burung mali lalu mai empas chukup besai ba jalai idup kitai ba rumah panjai,” ku iya ngelansa.

Ku Sang, genap bansa burung mali tu ngemai reti enggau bisi penti enda tau enda dititih lalu bisi sekeda ngena piring ading dikena ngintu burung nya.

“Ari tu mega kitai bansa bisi nirika Gawai Burung kelai pemesai reti pengarap beburung,” ku Sang madah nyemetak.

Lansa reti tujuh burung mali tu iya nya Ketupong ti ngemai reti burung ngasi lalu orang deka ningaka nuan. Beragai tu madahka ruang bilik orang ke ninga munyi iya deka ditinggang penusah, ku Sang.

Bejampung

Bejampung tu nyadi mata enggau pending ti lansik, madahka orang ti ninga munyi iya deka bulih utai lalu Pangkas mai reti rua enggau lebu, ti madahka pengawa nadai pulaika pemanah.

Embuas tu ku Sang, mai berita ti enda menuku, anang enda bejaga.

“Enti bisi ninga Embuas kejang deka nurun nyabung, burung tu manah tang enti sema kitai ninga Embuas lebuh udah datai ba pendaie, burung tu enda badas.

“Bebida enggau Papau tauka disebut Kelabu ti nyadi burung ngibun, ngayung enggau nyaga ari munsuh.

“Enti bisi ninga Papau ba hari nembuka tebang, burung tu manah laban antu jelu, chit, pipit, empangau alau deka rabun mata enda meda.

Beragai

“Tang enti kitai bisi ninga Papau maya mansang ngasu, burung tu enda manah laban iya Burung Rabun, nadai bulih jelu.

“Nendak tu burung chelap tauka mai penchelap kelebih agi maya gawa bumai, rumah ti likun sereta lantang endur diau,” ku Sang madah nyemetak.

Nya kebuah ku Sang, penemu sentang pengawa tauka pengarap beburung baka tu meruan dijaga, diintu, diempuru enggau ditampung aku ngagai rebak baru ngambika sida nemu enggau meretika pemesai reti enggau tuju kitai bansa beburung.

“Pelaba aku mayuh kitai enda telepa bepedaka burung petara, meretika munyi burung penti. Ari kelansa tu, dikearap kitai deka nemu mimit tuju enggau reti pengawa asal ti ditampung ari aki ini, ti kala nyadika tinjau nasit pejalai kitai menya.

“Nya alai, enti kitai ngelala burung tu, sekalika tepansa, bisi ninga iya bemunyi, kitai patut bebasa, anang sekali deka nyetik tauka munuh laban sida tu mih kala mantu kitai kelia,” ku Sang nibarka jaku lalau.

“Nampung kenang ke udah bisi dilansa aku ba atas tadi, kelimpah ari tujuh burung mali nya, bisi siku agi burung mai reti besai amat ba pengidup kitai, iya nya burung Kenyalang, nya kebuah kitai bisi ngintu Gawai Kenyalang.

“Burung tu suah disebut dalam timang lebuh maya Gawai Kenyalang tauka timang amat. Lemambang ti ngesuhka leka timang Kenyalang suah nyebut kenyalang tu dikirumka Petara nyaup bala ngayau ngalahka munsuh.

“Ngambika banding burung kenyalang datai bepuluh iku lalu mantuk sereta ngemutaka mata munsuh ti dikena ngingatka tulung ari burung kenyalang tu, replika tauka pentik burung kenyalang didirika ba tiang di tanju lebuh orang miring begawai, Gawai Burung tauka Gawai Kenyalang,” ku Sang nyimpul penemu diri.

 

Embuas

Kenyalang

Ketupong

 

Nendak

Pangkas tauka Kutok

Papau tauka Kelabu