KUCHING: Diau ngatika diri lebuh ditinggal apai tuai nurun gawa ngujungka Bermas Senabong, 51 taun, milih awak bebakih enggau pengawa pengelandik jari kelebih agi nusuk manik.

“Rindu amat ati meda manik ti ditusuk nyadi buah dikedeka ati baka tengak, tangu enggau kereban indu bukai. Tu chara aku ngisi jam lebuh udah lepa ari pengawa ngintu ruang bilik.

“Manik tu meh ke bakih aku di rumah besehari sehari.”

Enti suba, asil jari ti udah tembu digaga nadai dijual, semina diberi pia aja ngagai bala kaban, bala ipar enggau sida ti bebakih, ku iya nikalka kenang diri.

Nusuk manik tu ku iya begunaka pengepuh enggau pemintar runding nengkebang motif sekalika nunda tauka ngaga motif baru.

Maya kediri ba rumah, mayuh macham utai dipansa ba runding, ati mega gagit deka nguji ngaga pengelandik jari tu nitihka penau dikembuan.

“Enti kitai berati, lebuh nusuk manik tu, tiap ubung ti bejantil, ripih motif enggau chura ti manding ngasuh tempa jari kitai manah dipeda. Penemu nubu ubung mega meseti dikembuan laban enda semua orang nemu pengawa tu.

“Bisi sekeda nemu nampung aja tang enda nemu nubu, laban penyampau tali ubung ti ditubu enda tau enda nipakka leka manik ti deka ditusuk.

Pia mega ku iya, semua pengawa ngaul pengelandik jari endang begunaka timpuh panjai, ukai ulih tembu sehari dua lalu belelebuh mega enda ditegu dataika bebulan.

“Ati meseti liat, puh beratika chura leka manik ti dipegulai antara pemar ditapi. Suah mega salah tusuk, direrak baru dataika iya meruan dipeda mata. Nyau pemuas enda mega entu berasai endur iya tembu.

“Suah mega mata alah laban chura ti terang, ditambah enggau leka manik ti alus amat,” ku peranak asal Rumah Anna Bandung, Nanga Kejaie, Bintangor pegai Pelilih Meradong.

Nangkan nya, iya mega bisi ngulu kelas ngaga baju Orang Ulu ba Akademi Serakup Dayak Iban Sarawak (ASADIA) ba Kuching ditu kelimpah ari kelas ngajat indu Iban.

“Aku rindu amat meda ngepan asal kitai Dayak. Chukup manding dikena sida ke dara ngelagu diri, nadai milih ni bagi ngepan.

“Ari penemu diiri lebuh ngulu kelas nya, aku mujur ngaga set ngepan indu Orang Ulu nyengkaum ketapu manik sida ti dikumbai BasongTa’ah dalam jaku Kenyah.

“Kelas ke bisi diatur sida ASADIA tu endang manah amat ba pengawa kitai ngetanka main asal enggau nampung penemu nempa ngepan asal kitai bansa Dayak,” ku iya madah nyemetak.

Diatu mujur amat ku iya, mayuh udah asil keranjai jari iya dijual lalu mansutka belanja ngagai iya empu ti semina gawa ngintu ruang bilik.

“Mayuh mega udal udah diterima aku naka diatu kelebih agi tangu enggau tengak. Sida muji asil tengkebang jari aku alus sereta chura enggau motif ti manding,” ku iya nanggam jaku.

PUH: Bermas nyinuk nusuk manik ba tangu digaga iya nitihka udal orang.

 

NGIRI PENEMU: Bermas (bediri tengah) mujur nembuka kelas belajar ngaga ngepan indu Orang Ulu ba ASADIA.

 

PEMISI: Entara tangu digaga Bermas empu ungkup anak dara iya.

 

NYINUK: Bermas benung kiruh nyait kereban pengias ba kain ngepan Orang Ulu nunda ajar sida ari ASADIA

 

BEBADAS: Entara keranjai jari Bermas nyengkaum tengak ungkup lelaki enggau indu.

 

BEBADAS: Entara keranjai jari Bermas nyengkaum tengak ungkup lelaki enggau indu.