KUCHING: Status Sarawak deka nitih ke asal enti ubah Perkara 1(2) Konstitusyen Perintah Besai dikemendar ba Aum Parlimen.

Kepala Menteri Datuk Patinggi Abang Johari Tun Openg taja pia madah, ubah status nya agi bedau diterit laban Konstitusyen Perintah Besai bedau diubah.

“Pengudah ubah bekaul enggau Konstitusyen Perintah Besai dikemendar, nyadi status pekara bukai mega deka berubah,” ku iya.

Abang Johari taja pia enggai nerang silik bekaul enggau status bukai Sarawak enggau Sabah.

“Kitai ukai agi megai status Nengeri tang Wilayah Sarawak. Tang anti ubah konstitusyen perintah besai dikemendar dulu,” ku iya.

Iya madah munyi nya pengudah bejadika Sarawak Career and Training Fair (SCaTFair) 2019 ba Palan Aum Borneo Kuching (BCCK) kemari.

Nerang silik kemaya perintah Sarawak ngaga ubah bekaul enggau tusun atur perintah, Abang Johari madah semua nya deka digaga pengudah ubah konstitusyen perintah besai dikemendar.

“Taja ubah konstitusyen perintah besai digaga, Sarawak agi mengkang dalam Malaysia,”ku iya.
Apin lama ke udah, pengawa meri pulai status atas Sabah enggau Sarawak baka ke udah dipekat dalam Sempekat Malaysia 1963 (MA63) nyadi fokus ba aum keterubah penggal kedua Parlimen Ke-14.

Menteri ba Opis Menteri Besai Datuk Liew Vui Keong, madah perintah ba aum kabinet kena 6 Mac udah setuju ngubah Perkara 1(2) Konstitusyen Perintah Besai ungkup tuju nya.

Chairman Komiti Teknila enggau Kereja MA63 madah, ubah konstitusyen ungkup Sabah, Sarawak enggau Semenanjung Malaysia nyadi bakih kunsi ngembuan hak sebaka.

MA63 ti ngujungka penumbuh menua Malaysia kena 16 September 1963, ngaku Sabah enggau Sarawak nyadi bakih besai ke ngembuan hak sebaka enggau Malaya (diatu Semenanjung Malaysia).

Taja pia, ubah ba Konstitusyen Perintah Besai kena 1976 ngujungka status Sabah enggau Sarawak diturun, bela dikumbai nengeri ke-12 enggau ke-13 dalam Malaysia.

Vui Keong madah ubah nya begunaka sukung dua pertiga tauka abis nadai 148 ari 222 kaban Parlimen (MP) ngambika iya dikemendar.

Sarawak status ‘wilayah’ enti ubahPekara 1 (2) Konstitusyen Perintah Besai udah dikemendar