Kitai diau ba menua ke diuan mayuh pupu bansa enggau pengarap – Kepala Menteri

“Nyadi rayat Sarawak, kitai patut nemu diri bisi kuasa ngelindung diri empu ari utai ti tau ngerusak menua lebih agi ari sukut bansa enggau pengarap.”

KUCHING: Rayat ba menua Sarawak patut nemu bebasaka pangan diri dalam semua pengawa.

Kepala Menteri Datuk Patinggi Abang Johari Tun Openg madah rayat Sarawak chukup benasit laban diau ba menua ti diuan mayuh pupu bansa enggau mayuh pengarap.

“Kitai ba menua tu ukai semina nyaga kaban ti sama pengarap Islam, tang deka sama besaup berati sereta nyaga kaban ari pengarap bukai laban tu nunjukka reti kebendar kitai sama diau dalam siti menua.”

“Nyadi rayat Sarawak, kitai patut nemu diri bisi kuasa ngelindung diri empu ari utai ti tau ngerusak menua lebih agi ari sukut bansa enggau pengarap,” ku Abang Johari.

Teks jaku Kepala Menteri Datuk Patinggi Abang Johari Tun Openg dibacha Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Hajah Fatimah Abdullah ba Forum Pengelantang Pengemeran Pengarap ba Palan Penerang Islam Sarawak Kuching, kemari.

BEGULAI DALAM PENGELANTANG… Fatimah begulai enggau bala ti sama bisi ngulu Forum Pengelantang Pengeran Pengarap beserimbai enggau Minggu Pengelantang entara Pengemeran Pengarap Dunya 2019 Renggat Nengeri Sarawak.-Gambar Ghazali Bujang

Nambahka nya, Abang Johari madah rayat Sarawak patut terus ngaga jematan alai rayat sama begempuru sereta sama ngemansangka diri.

“Menua Sarawak ngembuan mayuh macham pengarap enggau bansa, lalu kitai enda patut mekul diri empu dalam pengelain nya, tang patut agi temegah enggau diri empu laban nya ti nyadi pengering kitai.”

“Beratus tauka beribu taun kitai udah nerima sida ke bedagang ari menua China, India enggau menua bukai nyadi kaban kitai, nya alai kaul ti lama baka tu patut udah ulih nempa komuniti ti penyayau sereta nerima bida ari sesiku orang,” ku Abang Johari dalam teks jaku nya.

Taun tu forum pengelantang tu ari kerejasama entara Opis Penyerakup Nengeri enggau Integarasi Nasional Nengeri Sarawak (JPNIN), Unit Pengarap Bukai (UNIFOR) enggau Palan Penerang Islam Sarawak (SIIC).