KUCHING: Kaul sereta pengelantang begulai entara orang ke berimbai pendiau patut dijaga awakka enda nyadi laya.

Chairman Kawasan Rukun Tetangga (KRT) Tabuan Tranquility Fasa 4 (TT4) Norizan Jili madah palan genturung pendiau sida nya agi baru lalu sida minta mayuh agi dipatau bala polis enggau komuniti nyaup nyaga pengelantang genturung pendiau.

“Genturung pendiau TT4 tu lumur dua pemadu tinggi rikod pemayuh kes enchuri, nyerungkai rumah tauka enchuri wayar ti nyadi ba menua Kuching lebuh taun nyin kemari.”

“Nitihka pansik ke udah digaga raban polis lalu bisi dipadah ngagai kami, kes baka tu nyadi ukai ari orang ba menua tu, tang ari menua bukai lalu sida tu orang ti gian dadah,” ku Norizan.

Iya madah munyi nya lebuh pengwa bejadika KRT enggau Skim Rondaan Sukarela Tabuan (SRS) ba Tabuan Tranquility Fasa 4 (TT4), ensana.

KENANG… Norizan (baju chelum ba tengah) begulai enggau bala komuniti KRT Tabuan Tranquility Fasa 4, ensana.

Norizan madah KRT ba TT4 udah ngepunka pengawa rondaan sida ari taun nyin kemari.

“Dikena nagang mayuh kes enchuri nyadi ba endur tu, kami kala nguji chara nutup sekeda jalai ba gentung pendiau ditu tang chara nya nerima komplen ari bala ti sama nengah jalai besai nya.”

“Nya alai diatu kami nguji ngaga sticker entara kami ke diau ba genturung pendiau TT4 tu kena ngelai kami ti diau ba perumahan ditu enggau orang ke datai,” ku Norizan madah.

Iya mega madah ketegal ari kelalu mayuh jalai mit ba endur sida nya ngasuh sida tusah deka ngetanka orang ti enchuri tauka ngaga salah ba endur nya.

Nangkanka nya, nyentukka diatu bisi lebih 100 iku sida ke dalam KRT TT4 sereta 60 iku begulai dalam Skim Rondaan (SR).

“Pengawa matau sigi digaga ninting hari, bepun ari malam nyentukka dini hari lalu matau tu digaga beraban entara enam ngagai tujuh iku dalam siti raban, enda ngira laki tauka indu tang suah agi sida ke indu diengkah segulai enggau laki sida.”