KUCHING: Minggu Pengelantang Pengemeran Pengarap Sarawak nyadi peluang rayat begulai sejalai, nerima bida pengarap bukai ti nyadi pengering rayat Sarawak.

Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Hajah Fatimah Abdullah madah tiap iku orang patut besaup nyaga pengelantang ari sukut jaku enggau pengawa ukai semina ba Sarawak tang mega ba menukai bukai.

“Kami minta semua ketuai tauka komuniti ba selampur dunya tu enda nambahka pemenchi sereta ngemediska Islam tauka pengarap bukai laban nadai pengarap tauka bansa ti tau nyadi palan nerenakka ulah baka tu.”

“Kitai enda patut ngeletak ukum, pengandal, chura sereta bejai orang ba tiap genturung pendiau ketegal ari pengawa digaga orang bukai,” ku iya ti ngarika Kaunsil Indu enggau Ruang Bilik Sarawak.

Fatimah ngarika Kaunsil Indu enggau Ruang Bilik lebuh penerang berita ti diatur ba Palan Penerang Islam Sarawak (SIIC) Kuching, kemari.

BESERAKUP… Fatimah begulai enggau Kaunsil Indu enggau Ruang Bilik Sarawak sereta bala panel Forum Pengelantang Pengemeran Pengarap Sarawak mandangka sukung sida dalam nyaga pengelantang menua.

Dalam penerang berita nya, Kaunsil Indu enggau Ruang Bilik madah rayat patut beteladan ari kes ti nyadi ba Christchurch ti nyadi minggu tu tadi.

“Tu meh maya kitai bergempuru dalam pemansang pengarap ngetuka pengawa ti mai pngerusak ngagai menua lalu nganti nya ngena pemereti enggau basa entara bansa enggau pengarap bukai.”

“Kitai patut chakah ngereja pengawa pengarap awakka ulih nambahka pemereti sereta neritka kaul entara bansa enggau pengarap bukai,” ku Fatimah.

Kaunsil Indu enggau Ruang Bilik Sarawak madah sida nyukung penuh program ti diatur SIIC enggau ejensi bukai dalam mandangka dunya Islam, muji ejensi Opis Penyerakup Menua enggau Integriti Nengeri (JPNIN) Sarawak, Unit Pengarap Bukai (UNIFOR) sereta NGO baka Yayasan Penyerakup Sarawak dalam ngaga kaul entara komuniti enggau pengarap.

BASA.. Fatimah nunjukka genteran jaku patut bebasaka semua pengarap.