SARATOK: Bala penerima dikearap teulihka pemaik ari geran projek ti udah diagih ngagai komuniti sida.

Kaban Parlimen (MP) Saratok Ali Biju madah, bala komuniti patut ngelanggur program pemansang ti ngemai pengelantang enggau ulih nyungka ekonomi sida kelebih agi ba rumah panjai di menua pesisir.

“Langgur program mega enda tau enda ngaul bala komuniti ti datai ari serap umur, nadai ngira biak tauka tuai, ngambika sida bela ampit ngasaika pemansang ti dipejalai.

“Kitai bela ngandalka semua komuniti ngerebut tetiap program pemansang dibai perintah ungkup rayat, nyengkaum ari opis enggau ejensi perintah besai enggau nengeri,” ku Ali.

KE PEMAIK: Ali nyuaka chek ngagai pengari komuniti ti nerima geran rambau atur pengawa ba Palan Servis PKR Saratok ditu.

Kelimpah ari program pemansang infrastruktur enggau penyikap perengka rama pemun, Ali mega ngelalau komuniti beratka pemansang rama bukai baka isu pengerai enggau pelajar.

“Rayat endang bisi hak nerima enggau ngasaika semua pemansang, nya kebuah kitai nandu belama pengawa nangkup peminta enggau beratika peneka raban renggat baruh,” ku iya madah nyemetak.

Sebengkah pengawa nyuaka chek pemeri enggau geran projek penyampau RM400,500 ngagai bala komiti mujur diatur ba Palan Servis Komuniti Opis PKR Saratok ditu, apin lama ke udah.

Bala penerima datai ari Komiti Pemansang enggau Pengelikun Genturung Pendiau (JKKK) Rumah Anau Entebu, Serakup Apai Indai enggau Pengajar (PIBG) SMK Kabong, JKKK Kpg Hilir Empelam, PIBG SK Engkabang, PIBG SRK Hj Junid Gerigat, Serakup Alumni SK Abg Leman Kabong, JKKK Rumah Mawat Lampas Bratong Atas Roban, Kawasan Rukun Tetangga (KRT) Kpg Tengah Sesang, Komiti Masjid Kpg Gerigat, PIBG SMK Saratok, Komiti Surau Darul Taqwa Kpg Tanjung Saratok, JKKK Kpg Hulu Kupang, JKKK Rumah Ebie Ibus Roban, Lembaga Amanah Kebajikan Islam Roban enggau JKKK Rumah Dana.

HAK RAYAT… Ali (duduk tengah) disempulang bala bukai begambar enggau bala penerima geran pemeri enggau projek rambau atur pengawa nyuaka chek apin lama ke udah.