Sida suah kena emba gangster kelimpah deka diberi makai suap

“Tang semua tu ditapi kami enggau pengeliat ati, laban kami andal piak bekuasa ulih nyaga pengelikun kami. ”

KUCHING: Diemba kelimpah deka diberi makai suap. Nya mih pekara ditapi raban Unit Pemansang Aplikasyen enggau Sistem (SADU), Opis Kampung Sarawak (JHS) dalam bejalaika penerit adat bekaul enggau pengawa nebang kayu belalai.

Tang, semua nya enda ngelemika semangat sida terus bejalaika tanggungpengawa nyaga keresa kampung menua ari diambi bala lanun kampung.

Ketuai raban SADU, ke semina dikangau nama Sufian madah kelimpah diri empu, diri sebilik mega kala kena emba gangster kem batang.

Ku iya, bala kaki tauke kem batang tu kempang ngaga sebarang aja pengawa maya ringat enti pengawa sida ditemu raban JHS, ke ngujungka sida rugi.

“Kala ruang bilik kami kena emba piak ke ngereja kem batang, pengudah kami ngerara lalu muai asil sida.

“Tang semua tu ditapi kami enggau pengeliat ati, laban kami andal piak bekuasa ulih nyaga pengelikun kami, ” ku iya nusui peneleba diri pengelama tiga taun gawa ba unit tu.

Kelimpah nya, Sufian madah sida mega kala deka diberi duit ke mayuh dikena nutup mata tauka ngelepas lumpung kayu enggau kereban ke dirampas.

Taja pia, ku iya laban ngerunding keresa menua lebih berega dia kami nulak duit suap nya.

“Kami kala deka diberi urung RM140,000 ngambi ngelepaska kereban pengangkut ngundan batang ke ditan tang berundingka keresa menua, kami enggai nerima,” ku iya.

Raban SADU ke semina diarika empat staf JHS nyekat ulah nebang kayu nadai pemendar ba Sarawak.

Tu endang tanggungpengawa ke berat laban deka betapi enggau bala lanun kem batang di kampung.

Kelimpah dikeruga gangster kem batang, bini mega suah nganu, ku iya ke mega siku ari raban nyereta raban SADU ti enggai disebut nama, seraya madah nya berindik ari sida ti jarang bisi awak

“Dalam sebulan, engka sehari aja kami di rumah, ninting hari kami ba kampung lalu jauh ari diri sebilik.

“Kekadang maya pulai ke rumah, enda datai sehari nyau dikangau nurun baru enti bisi operasyen. Ni enda bini nganu,” ku iya seraya betundi.

Berebak enggau nya, Direktor JHS Hamden Mohamad madah piak sida napi pemar ke chukup besai ba pengawa nyaga pemaik kampung Sarawak ke ngembuan urung 7.9 juta hektar pemesai.

Taja pia, ku iya JHS taun tu manggau umur 100 taun tang agi ransing meri servis ke manah ngaga nengeri dikena nentuka kampung dijaga manah.

“Ari sukut nisbah penyampau kaban JHS, sida ngembuan takah ke chukup besai iya nya 1: 9000 (siku staf nyaga abis nadai 9,000 hektar hutan) dibanding enggau Semenanjung Malaysia semina 1:
900.

“Nyadi tu begunaka 10 kali lipat pengulih kami dkena nyaga kampung,” ku iya.
Iya madah pemedis JHS nyaga kampung laban gaya bumi enggau jalai penyambung ke chukup mar.

 

NYIDI…Kaban SADU benung meresa kilang kayu nyidi batang kayu ke ditebang nadai belisin.

NYIDI…Kaban SADU benung meresa kilang kayu nyidi batang kayu ke ditebang nadai belisin.

DITUNU…Kaban SADU nunu kayu ke ditebang nadai belisin.

KEM BATANG NADAI BELISIN…Sebengkah kandang endur bejalaika pengawa nebang kayu nadai belisin ke diputar raban SADU.