KUCHING: Langgur penemu deka ngidupka baru Sarawak Rangers nerima timbal ke manah ari raban veteran soldadu di menua tu.

Siku veteran soldadu, Lt Kol (B) Rizal Abdullah PGB madah rambau iya agi nyadi presiden Veteran Soldadu Sarawak Renjer (SRVA), perambu tu kala dikenatai ngagai ex-kepala menteri Tun Pehin Sri Abdul Taib Mahmud urung taun 2012 tang empai nerima timbal.

“Sarawak Rangers tu kelia bepun ari nama Iban Trackers chukup tebilang enggau pengelandik nyidi munsuh ba babas enggau pemerani sida beperang.

“Siku soldadu orang putih ti kala begulai gawa enggau Iban Trackers kala nyebut munyi tu ‘Iban Trackers are the best trackers in the world’,” ku iya madah nengah aplikasyen WhatsApp ngagai Suara Sarawak.

Lt Kol (B) Robert Rizal Abdullah PGB

Nitihku Rizal, sekumbang 12 taun beperang ngelaban komunis semina 21 iku aja sida midang. Penyampau tu pemadu mimit enti diperati sentang tanggungpengawa berat sida nyadi raban ke pemadu diluan ngelaban munsuh.

“Tu ngujungka mayuh ari sida diberi basa nerima anugerah ketegal pemerani nyengkaum midul George Cross, Midul George (sama tikas enggau PSB),” ku iya.

Tandu Rizal, ba jeman diatu kuota Sarawak Rangers patut dipasuk semua bansa ukai baka kelia ke semina ngambi orang Iban aja.

“Ngarapka penumbuh Sarawak Rangers ke baru, pengelandik ke udah ngemegah raban tu patut dititih sereta dikerembai ngagai rebak baru,” ku iya.

Kena 8 March tu tadi, Menteri ba Opis Menteri Besai Datuk Liew Vui keong madah Perintah Besai setuju ngubah Perkara 1 (2) Konstitusyen Perintah Besai dikena nukar status Sabah enggau Sarawak nyadi bakih kunsi sebaka enggau Semenanjung Malaysia nitihka Sempekat Malaysia (MA63).

Bekau ari ubah tu mega mungkur ngidupka Sarawak Rangers iya nya raban ti ngemegah anak Sarawak.