KOTA SAMARAHAN: Pengerindu ke pengawa belagu sereta tanggungpengawa nyadi pengelicha ukai nyadika penanggul ngulihka penyulut ba Pengerami Anugerah Gemilang UNIMAS (MAGU) 2019.

Siku pengelicha Fakulti Seni Gunaan Seni dan Kreatif UNIMAS, Alexander Anak Chelum, 35 entara orang ti mujur bulih Anugerah Servis Nyulut MAGU 2019 madah diri chukup gaga lalu enda nyangka tau bulih anugerah nya.

“Aku berengkah gawa ba UNIMAS kenyau taun 2010 ari tanggungpengawa nyadi Tutor, sebedau ke diangkat nyadi pengelicha ba taun 2014, urung semilan taun aku udah gawa ke UNIMAS.

“Sekumbang gawa ba UNIMAS, tanggungpengawa pemadu besai dipangku aku iya nya lebuh aku dichiri nyadi koordinator program lalu dia aku mayuh betemu enggau orang sereta meri timbal ngagai pekara ke di tanya orang,” ku Alexander.

Alexander ti tebilang enggay lagu ‘Milih Menantu Indai’ madah endang bisi pemar diasai lebih agi ba sukut ngatur jam ungkup pengerindu enggau batang pengawa.

“Sebedau ngepunka pengawa belagu suba, aku endang udah ngasai diri patut bisi pemerat dalam magi jam gawa.
“Taja pia, aku enda malut pengawa belagu enggau pengawa nyadi pengelicha,” ku iya lebuh dirandau.

Ba pengawa nyadi pengelicha, aku endang ngemeratka tanggungpengawa tu, lalu pengawa belagu, semina dikemeran maya ujung minggu awakka enda ngachau jam gawa enggau belagu, ku Alexander.

“Tu baru pengepun ba aku awak aku ulih meri lebih manah agi ngagai UNIMAS jemah.

“Diatu aku ngarap ulih nampung pelajar aku nagagi tikas PhD awakka mayuh agi pengawa ulih digaga dikena nyaup UNIMAS lebih agi ba sukut pansik,”ku Alexander ti mega bisi Master Degree ba bidang Pesaka enggau Muzium.

Siku agi staf ke bela nerima anugerah nengah MAGU iya nya Julis Anak Junting, 58 taun ke mujur nerima Anugerah Basa Ngemujur, madah udah 17 taun gawa ke UNIMAS lebih agi ungkup Fakulti Berubat enggau Pengerai.

“Aku berengkah gawa ba UNIMAS kenyau ari taun 2002 pengudah aku angkat ari Opis Menteri Pengerai suba.
“Ba fakulti, aku mantu sida nembiak ke ngambi bidang indu misi enggau lutur,” ku iya.

Kelimpah ti chakah dalam pengawa ngajar, Julis mega chakah ba pengawa main lebih agi lebuh udah mujur bulih dua midul perak ba Kaunsil Pengintu Pengelantang Pendiau enggau Lumba Pengereja Pengawa Perintah (MAKSAK) 2019.

“Laban ke enda lama agi deka pinchin, nya alai nadai mayuh utai dipinta tang tetap bejalaika pengawa manah ungkup UNIMAS.

“Ngagai nembiak rebak baru, mayuh peluang disediaka UNIMAS, semua nya bepanggai enggau pemagas kitai empu mansang begulai enggau orang bukai ukai tegal deka ngalahka orang tang ngaul diri bekelala enggau orang mayuh,” ku Julis.