“Pemansang tu ukai semina ba Batang Oya tang ba selampur menua Tamin nerima pemansang ke sebaka.”

TAMIN: Projek kebun dandang besai deka dikemansang ba sitak Ulu Oya ke mungkur Pelilih Menua Paku enggau Pelilih Menua Lalai ditu.

Nitih penerang projek tu dikemansang nengah kerejasama Opis Menteri Betanam Betupi Moden, Tanah Adat enggau Pemansang Kandang Menua Sarawak enggau Gerempung Pemansang Pelilih Menua (ADC) Batang Oya, Pakoh enggau Sekuau.

Kaban Kunsil Nengeri (ADUN) Tamin Ir Christoper Gira Sambang madah iya deka mantu piak gerempung tu minta sebarang aja bantu ke bisi disedia perintah nengeri.

UNGKUP RAYAT…Henry Kanyan (kiba) nyuaka surat perambu projek ngagai ADUN Tamin Ir Christoper Gira ngambi diperunding piak ke bekaul. Bela dipeda Penghulu Ngalai Asom (kanan).

“Aku chukup gaga meda gerempung tu ulih bekerejasama enggau perintah sereta ejensi bukai.

“Mayuh projek pemansang nengah bantu Projek Transformasyen Menua Pesisir (RTP) udah dikemendar ba sitak Taminn enggau Batang Oya, Ulu Oya, Sekuau enggau Pakoh.

“Pemansang tu ukai semina ba Batang Oya tang ba selampur menua Tamin nerima pemansang ke sebaka.

“Tu mungkur sitak Balingian, Selangau, Tamin, Sekuau enggau Siong,” ku iya nengah penerang nuju Ruai, Suara Sarawak kemari.

Berebak enggau nya, Gira madah ungkup Tamin iya diatu fokus ngatur projek ngaga jalai raya enggau nyungkak tikas ekonomi rayat di menua pesisir.

“Pemisi jalai raya entara utai ke pemadu beguna laban enti nadai jalai raya semua projek ekonomi deka tejanggal enggau laun,” ku iya.

Nya alai, Gira meri terima kasih ngagai piak kem batang laban udah mayuh mantu peranak menua pesisir baka di Ulu Oya.

“Ambika chunto, ba sitak Ulu Oya nuju ngagai Rumah Seliau sebuah serikat iya nya Mutiara Alam Jati udah mantu nengah Tanggungpengawa Rama Korporat (CSR) sida ngagai rayat.

“Tu mih chunto pemadu manah ke patut ditan ke pemaik rayat,” ku iya.