Bepun ari urat, daun sereta buah iya ulih diproses nyadi rempah pemakai, ubat enggau ngasilka bemacham produk bukai

Nyangka mayuh kitai bansa enda nemu pun ke dikumbai pun Pahkak tauka Litsea Cubeba.
Rengut ke diulih ari leka Pahkak tu enda nyalah baka bau serai lalu leka pun tu kurang lebih baka leka lada.
Pahkak tauka Litsea Cubeba siti ari pun ti mai mayuh guna dalam pemakai enggau guna ba pengerai.

Pun kayu Pahkak tu mayuh tumbuh ba babas sereta ba alai ti tinggi, lalu enda semua orang nemu pun tu mai mayuh guna.

Ketuai Bansa Kelabit ari genturung pendiau Pa’Lungan, Bario, Heyward Inu Pu’Un,65 taun madah Pahkak tauka ba jaku bansa sida dikelala enggau Tenem tu mayuh guna.

“Enti suba, kami mayuh nguna leka ari pun tu dalam pemakai.

Pun Pahkak tauka Tenem ngembuan mayuh guna

“Aki ini kami kelia endang beguna amai ke pun tu lebih agi leka iya ulih diguna maya nyumai pemakai,” ku Heyward.

Iya madah rambau sida aki ini sida kelia, sida semina nemu guna pun tu ari leka nya aja.

Tang diatu, enggau pemansang ari teknologi sereta bantu ari sida Palan Biodiversiti Sarawak (SBC), pun tu chukup mayuh guna.

“Suba semina nemu leka aja bisi guna, nadai kala terunding pun kayu nya enggau daun iya mega ulih digaga nyadi produk ti manah ke guna pengerai.

“Kami suba semina nemu nyampur leka pun tu enggau garam lalu nyadika rempah dalam pemakai kami,” ku iya.

ASIL TENEM… Produk ke dipansutka ari leka, daun enggau pun Tenem.

Lebuh dirandau, Heyward madah sida udah lama ngaul diri dalam projek pemansang pun Tenem.

“Aku enda entu nemu baka ni kami tau mungkal enggau projek tu, tang nitih ke utai temu aku, siku ari kami ba menua nya bisi enggau sida raban NGO bejalaika pansik pasal Tenem.

“Urung 15 taun pansik pasal Tenem udah dipeejalai ba menua kami, tang aku baru lima taun bisi enggau sida NGO tu,” ku iya nerang.

Heyward madah ba menua sida chukup mayuh pun tu lebih agi ba babas laban pun tu endang tumbuh ngapa.

Pun kayu Tenem tu tumbuh ngapa ba babas enggau peninggi pun tu bisi 30 ngagai 40 kaki, lalu pemesai semina mesai betis siku mensia tubuh besai, ku Heyward.

REMPAH PEMAKAI…Leka Tenem iya ke udah dijembi chukup manah dikena ngulai pemakai.

“Taja pia, Tenem tu enda lama idup baka kayu bukai. Pengelama iya ulih idup semina naka 10 ngagai 12 taun aja,” ku iya nambah.

Lebih ari tikas nya, pun kayu Tenem deka mati.

Heyward madah, leka Tenem tu tau diketau udah pun tu manggai umur tiga taun.

“Enti nitih diatu benung maya pun tu bebungai, lalu tau diketau ba pengujung bulan Mei tauka Jun.

“Nyangka mayuh orang enda kala meda pun Tenem laban pun tu tumbuh ba babas, tang diatu, aku empu bisi nanam pun tu ba kebun aku empu,” ku Heyward.

ARAP TERUS MUJUR…Heyward Inu Pu’Un enggau bini iya Doris Teo Guak Kiaw, 65 taun.

Kebuah pia laban aku meda mayuh guna ke ti manah diulih ari tenam.

Daun Tenem ulih digagaka ubat

Ku Heyward, pun Tenem tu chukup mayuh guna enda nyalah baka orang bansa China ngaga ubat ngena utai tumbuh ari daun, pun dataika urat sekali ulih diguna sida.

Lebuh dirandau chara ngetau leka tenem, Heyward madah diatu sida ngetau ngena injin baka kena ngembuah sibau.

“Tang enti kelia, sida aki ini ichit kami semina niki ngambi kediri ngena jari sida laban nadai teknologi mantu sida suba.

“Udah diketau, leka Tenem deka dirurut ari tangkai baka kitai ngereja lada.

“Udah nya tadi, leka tu dibasu, diengkah dalam tong besai bisi ai, diangat dalam nya pengelama enam jam,” ku Heyward lebuh nerang chara ngintu leka Tenem.

Heyward madah dikena ngaga seliter minyak ari leka tenem tu, begunaka kurang lebih empat ngagai lima pun kayu Tenem.

“Enti ba menua kami, empat ngagai lima pun kayu tu ulih mansutka 30 kilogram (kg) leka Tenem.

“Lalu ari 30 kg nya, baru kami ulih ngemansutka seliter minyak leka Tenem,” ku iya.

Nangkanka nya, Heyward madah pemayuh nya agi kurang enti dibanding enggau asil ke diulih sida komuniti ari menua lain.

Kekadang, sida komuniti ke bukai tau ngulih seliter semina ari 16 kg leka Tenem aja, ku iya.

Taja ngulihka Tenem baka muntang didinga, tang mayuh pemar mega diasai sida ke bejalaika projek ngemansangka Tenem tu.
“Siti pemar iya nya dalam nganti pun tenem tu tau diketau laban iya ngambi masa ti lama alai pun tu tau diketau lalu enti ulih aku minta sida ari SBC ngaga pansik chara ngetau Tenem tu.

“Kelimpah ari nya, laban Tenem tu makin tampak didinga rita, lalu kami ke bisi bejalaika pengawa nanam, ngintu sereta ngumpul Tenem tu irau enti sema orang bukai kelimpah sida SBC tama ngagai menua kami enggau nadai pemendar,” ku iya madah pengirau diri.

Ukai semina pengirau ngagai mensia, Heyward madah pengirau ti diasai sida diatu iya nya ari burung.

“Bisi sebansa burung ti rindu makai buah tu lalu tu ngacau asil ke dikeulih kami ari pun Tenem.

“Ba bansa kami Kelabit, burung nya lebih silik agi dikangangau ngena nama Burung Sirak,” ku iya.

Minyak Tenem
Nangkanka nya mega, Heyward ngasaika jam dikena mansutka minyak tenem tu chukup lama iya nya enam jam.

“Kami ba menua Pa’Lungan tu udah datai karan, lalu enti ulih kami minta sida SBC beratika chara mansutka minyak Tenem nya enggau jampat agi sereta enggau lebih muntang ngena pemansang teknologi ke dikemisi.

“Mayuh bantu diberi sida SBC ngagai kami, lalu naka ke diatu kami sigi diberi empat silinder tong gis tiap komuniti ke bisi bejalaika projek Tenem,” ku Heyward.

Taja pia, ketegal sida ke diau ba menua jauh, naka ke diatu bisi subsidi tong gis diberi ngagai sida ke bejalaika projek nya.

“Tang enti sema nadai subsidi tong gis nya, tong gis nya tau manggai RM 70 setong.

“Tu mega nyadi penanggul ba kami enti sema tong gis ke berega RM29 setong nya nadai agi subsidi,” ku iya madah penusah ati nyema nadai agi subsidi nya.

Ku Heyward madah, taja sida bulih mayuh untung ari seliter minyak Tenem nya, tang nya enda tepulaika pengelelak nyaga minyak Tenem nya pansut, sereta pemayuh tong gis dikena manduk Tenem.

Heyward meri terima kasih ngagai sida SBC laban udah ngajar sida chara ngetau, ngulihka penguntung ari pun Tenem.

“Enti enda ari sida, kami komuniti menua pesisir tu lebih agi ke diau ba Bario nyangka enda nemu chara ngena Tenem.

“Aku ngarapka projek tu deka dikemansangka belama laban mayuh penguntung ke diulih kami ari projek tu ukai semina ari belanja, tang mega ari penemu belajarka utai baru,” ku Heyward madah.