Penyampau tu bepelasarka penyakit tibi ke dirikod ari taun 2018 nyentuk 2018

KUCHING: Sarawak agi ngerikodka penyampau kes penyakit tibi ke tinggi dalam timpuh 2008 nyentuk 2018.
Nitihka penerang Direktor Opis Pengerai Nengeri Dr Jamilah Hashim, penyampau kes tibi ke dirikod dipeda niki dalam timpuh 10 taun tu.

“Penyampau kes ba taun 2008 bisi 1,812 niki 70 peratus ngagai 3,121 kes ba taun 2018, siti penyampau ke chukup besai lalu patut dikemerat,” ku iya.

Nya alai, iya madah Opis Pengerai Nengeri deka ngatur mayuh program dikena meri penyedar nyengkaum mantu merubat enggau nagang tumu beserimbai enggau Hari Tibi ke dipasuk urung 1,200 penyereta kena 24 Mac ninting taun.

Berambaika jaku ‘Ke Arah Sarawak Bebas Tibi: Kesan Awal dan Pastikan Sembuh’, program tu dikena nyungkak tikas penyedar penyakit tibi ungkup mensia mayuh.

Tuju besai program Minggu Penyedar Penyakit Tibi di Sarawak iya nya dikena nambahka penemu mensia mayuh pasal penyakit tibi nengah pengawa ngatur aktiviti promosyen enggau nagang, negapka aktiviti nyidi enggau merubat penyakit tibi,” ku iya nengah aum pemberita ke diatur ba Saradice, BDC, Kuching kemari.

KELALA TIBI… Dr Jamilah Hashim (tengah) begambar kenang enggau penyereta program Minggu Penyedar Penyakit Tibi di Sarawak ke diatur ba BDC, kemari.

Iya madah, dikearap nengah program nya mensia mayuh ulih ngelala chara nagang penyakit tibi enggau chara berubat pengudah nemu diri bisi kelai kena tibi.

Kelimpah nya, iya mega nyadi pelasar chara ngelala penyakit tini enggau chara ngubat ke patut.

Penyakit tibi datai ari sebansa kuman ke dikumbai Mycobacterium tuberculosis.

“Lempuang entara perengka dalam tubuh ke suah kena kuman tibi, taja pia perengka tubub ke bukai mega ulih kena rampit.

“Penyakit tibi ngerekai lebuh orang ti kena penyakit tibi batuk, engkasik enggau ngeludah sengapa endur.

“Nya mandangka penyakit tu ulih ngerekai nengah angin, enti bisi batuk enda ngetu lebih dua minggu, tabin, bepeluh malam hari, enggau makai, berat tubuh nurun enggau batuk bisi darah patut jampat nganjung diri berubat,” ku iya.

Chara merubat tumu nitihka timpuh beguna amat ngambika penyakit tu enda majak ngerekai.
“Siku orang sakit ulih ngerampung 10 ngagai 15 iku orang.

“Nya alai, pengawa nyidi enggau merubat penyakit tu beguna amat abis nadai pengelama enam bulan.
“Pesakit ke ngetu berubat agi ulih ngerembaika kuman tibi,” ku Jamilah.

Beduduk ari tu, piak opis menteri pengerai patut nyendiaka servis bas mindah kin kitu ba neresa ngagai selampur nengeri nyengkaum Kuching ngambika mayuh sida ari menua pesisir diperubat enggau diseliah ari penyakit tibi.

Nitih ripot Gerempung Pengerai Dunya penyakit tibi entara 10 kebuah kes pemati ba serata dunya.
Bepelasarka Pelin Strategik Nagang Tibi Nasional (2016-2020), menua nyelinting urung 25 peratus pemati ketegal tibi manggai 2020, tu begunaka perati ari mayuh piak.