KUCHING: Belum tauka suah agi dikumbai kitai buah akar belum, sebansa buah kayu ti mayuh tumbuh dalam kampung asal, randau iya ngerayap sereta melit niti batang enggau dan kayu.

Kenu ku Sang Sanjan, 40 taun, empa penyuah bejalai gawa ke kampung nitihka pangku pengawa diri, mayuh amat bansa buah enggau kayu kampung udah ditemu enggau dipeda mata iya.

“Bisi tau diempa pia aja, bisi sekeda meseti dibela tauka dipanduk dulu, enda kurang mega buah ti ngundan rachun lalu tau nganu nyawa.

“Ukai muntang bejalai neresa kampung jauh kulu, suah mega nadai dinga panjung tauka kukuk manuk, reti nya jauh ari genturung pendiau orang. Meseti ka sikar enggau ngembuan penemu bagi bansa buah tauka daun tau diempa enggau enda,” ku iya.

Buah belum tu jarang amat tumbuh semak genturung pendiau, nya kebuah iya jarang dipeda, tau dikumbai rebak kemaya hari kada ke ngelala buah tu, kitai ke besai tuai tu mega dipelaba bisi enda ngelala.

PESAKA KAMPUNG… Buah belum ti udah chukup tuai ulih diempa tang meseti ka direbus dulu, kena muai bau pang enggau enda ngasuh mabuk.

“Benasit amat bisi tepansaka buah tu empai lama lebuh bejalai mindah ke menua Long Tanyet, tungga ulu Belaga. Bisi gambar dikunsi enggau bala lebuh mulaika diri ke mengeri, taja buah enda ulih dibai nyengenda.

“Suah agi akar buah belum tumbuh belah tebing ai kelimpah ari tumbuh sebelah tanah emperan enggau bebukit sereta jarang amat tumbuh ba tanah paya baka ke suah dipansa lebuh mindah ke dalam kampung,” ku Sang, peranak asal Rumah Linggie Layang, Nanga Sikit Ulu Kakus, Tatau Bintulu.

Buah belum tu ku Sang kira mesai kuan tauka lengan kitai besai tuai, sedang iya pemesai. Enti agi puda, buah bechura gadung puda lalu mali chura seram enti chukup tuai tauka mansau.

Kulit buah tu lemi tang isi tauka leka ba dalam buah ke kering amat, liat lalu balat bau pang. Gaya buah ti betangkai, mayuh bedijir ba tetiap randau ke melit dan kayu mega nyelai laban nadai milih bansa kayu dibelit iya.

“Buah tu tau diempa kitai tang meseti direbus dulu, lama agi ari ngerebus buah empasa kitai, laban enti buah enda chukup mansau tau ngasuh kitai mabuk tauka ngelu pala sereta bau pang.

“Kekadang sampai tiga kali nambahka ai maya ngerebus. Buah belum tu sigi liat, nya kebuah lama maya manduk. Iya ke ditemu aku nadai chara bukai manduk buah tu semina ngena chara rebus aja.

“Asai buah tu nyauka sebaka enggau buah empasa, belemak sereta nyamai diempa pia aja, enda ibuh dichal ngena gula, madu tauka pemakai manis bukai,” ku Sang nerang silik.

Ari penerang ke dikunsi iya, Sang ngarap mayuh agi rebak diatu enggau bala bukai deka ngelala gamal enggau gaya pendiau buah belum tu, sebansa ari buah kampung ti tau diempa.

RINDU NGIGA BUAH BELUM… Sang begambar ba ai kerangan lebuh bejalai ngiga buah belum ba, adap ulu Belaga.