SARATOK: Karnival Jaku English enggau Sukut Bejaku (ELC) renggat Sekula 2019 mujur dilanchar Sekula Primari (SK) Mendas, apin lama ke udah.

Semua 57 iku nembiak udah mantaika penau sida bejaku ba mua mayuh nipakka pengangkun sida empu ba atur program dua hari berunggu nya.

Nitih ku penerang, bala nembiak tu udah nyereta aktiviti macha leka main, bejaku ba mua mayuh, becherita enggau belagu dalam ‘Mendas Kid Speakers Championship’ ti nyadi siti ari aktiviti luar kelas di baruh Highly Immersive Programme (HIP).

Ba hari kedua atur program, sepenyampau 14 iku nembiak Primari 5 nyereta ‘Scrabble Workshop’ ti ngemai bala nembiak bemain scrabble ari embing pengajar Jackson Tandang.

Nengah program tu, PIBK SK Mendas udah nyaup raban sekula nyendiaka perais enggau midul ngagai nembiak ti bulih tiga penuduk pemadu nyulut ba genap kelas dikena meri peransang ngagai sida.

Piak sekula meri tabi puji ngagai raban PIBG udah gerah jari sereta nyukung program diatur ba sekula dikena ngangkatka penyulut akademik enggau kokurikulum bala anak sida.

Tabi puji mega diberi ngagai semua nembiak ti ransing nyereta aktiviti diatur sereta enda sanggu bediri atas panggau mantaika penau diri, gagit mekit bala bakih bukai ari pengangkun dikembuan sida.

Singkang beribu batu penyauh tentu bepun ari singkang keterubah nuju pemujur enggau idup ti menyana jemah setipak enggau rambai jaku nyadika peransang sekula, Arise Mendas and Shine!

BEPENAU…Siku ari nembiak ke ngambi bagi ba program nya benung mantaika pengelandik diri bejaku ba mua mayuh.

 

PROGRAM MANAH…Entara bala pengajar SK Mendas ti ngemujurka program nya.