GEDONG: Perintah Sarawak enda belembut enggau perintah besai pasal empat pekara ke dipenggi Sarawak.
Kepala Menteri Datuk Patinggi Abang Johari Tun Openg madah, empat pekara tu iya nya otonomi ba kuasa imigresen; hak sentang tanah nengah undang-undang Kanun Tanah Nengeri Sarawak; adan Sarawak enda ulih diubah nyengkaum tebing tasik enggau pelantar benua; asil nyengkaum ba baruh tasik enggau tanah Sarawak.

“Ba randau Sempekat Malaysia 1963 (MA63) aku udah madah ngagai ketuai tinggi perintah besai iya nya empat pekara tu enda ulih dirunding tauka dibatak asur,” ku iya.

Kenu ku Abang Johari, Perintah Sarawak diatu benung bebendar ngambi pulai hak-hak nengeri tunke udah lenyau baka ke udah dipekat dalam MA63.

“Ba konstituensyen Perintah Sarawak bisi hak bejalaika chukai jual ngagai minyak enggau gis, nyadi taun tu kitai deka bejalaika chukai jual ngagai minyak enggau gis ari Sarawak.

“Nengah chukai tu, iya deka meri penatai pemisi tambah urung RM3 bilion ngagai Sarawak,” ku iya ba Pesta Gedong 2019 kemari.

DATUK PATINGGI ABANG JOHARI TUN OPENG

Iya madah, Perintah Sarawak nengah iring GPS deka ngemeratka pemansang Sarawak, ngambi nengeri tu seriris enggau Semenanjung Malaysia.

“Anak Sarawak anang diuji, enti diuji baya pansut. Nya alai GPS deka ngemeratka Sarawak, ukai reti kitai pansut ari Malaysia.

“Sarawak deka bediri sama tinggi enggau duduk sama baruh enggau orang Malaya sereta ngambi pulai hak-hak ke udah lenyau,” ku iya.