Niang Dunging meruan dipebasa taja udah midang ketegal penemu enggau pemintar nengkebang utai

KUCHING: Nama Dunging Gunggu ti midang taun 1985 enda dibai iya lesi tang mengkang idup sereta semampai dikenang bansa ba dunya tu lalu umur niang lebuh midang ngelui 85 taun.

Kenu ku siku ari tiris iya, Partie Anak Lanchang, niang Dunging tu digelar Raja Tengkebang laban penau iya nempa utai enggau panjai runding ari orang bukai, puh nyakal penemu bala mayuh lebuh baum sereta nadai kala alah penemu enti bejaku.

Enti disebut nama niang Dunging ba menua Betong, Debak, Saratok, Roban, Sarikei, enggau menua bukai baka Spaoh enggau Sri Aman jarang bala Iban enda nemu sereta bebasaka niang ketegal penemu enggau pemintar iya nengkebang utai.

“Niang Dunging tu endang asal orang rumah panjai Nanga Ulai, Rimbas di Debak. Diatu, orang ke nampung bilik penaik niang Dunging iya nya Tuai Rumah Bagat empu, anak iru iya.

AGI KERING… Gambar Tuai Rumah Bagat ti nampung bilik tuai niang Dunging ke diatu.

“Apai aku empu, Lanchang Anak Majau kala dipadu nyadi tuai rumah dalam taun 1960an lalu disilih menyadi aku, Tinggi Anak Lanchang dalam taun 1980an sebedau Tuai Rumah Bagat nyilih penuduk nya,” ku Partie ngelansa.

Nikal ngagai jerita niang Dunging tu ku Partie, sida bisi tujuh iku diri menyadi, empat lelaki enggau tiga indu lalu gaya pendiau niang Dunging endang nyelai ari orang bukai.

“Iya berengkah nengkebang utai ke nyelai, ngelui ari runding kitai bukai kenyau ari iya berangkat bujang. Iya teulihka runding ari pengawa berati utai ke bisi ngelingi ti ulih ngemuntangka pengawa iya besehari sehari.

“Siti ari utai nyelai ditengkebang iya endang dipeda mata aku empu iya nya ngaga ngeli. Seduai iya melaki bini endang bisi ngeli. Aku empu kala dianjung niang indai nyabut ngeli ngagai niang Dunging ngena puchau. Baka tau ajih,” ku Partie nikalka kenang diri agi mit menya.

Kelimpah ari nya, niang Dunging mega bisi nengkebang urup lalu dalam taun 60an ngagai 70an endang agi mayuh bala nembiak Dunging ke mengkang ulih ngena urup iya betulis surat enggau pangan diri.

“Bala sida nya diatu engka udah manggai 75-80 taun umur lalu bisi sekeda sida nya bala orang kereja perintah tauka kumpeni sereta mayuh sida udah pinchin gawa.

“Niang mega bisi nempa gelang enggau tinchin tusah ati, digaga ari tembaga ti nyauka baka gamal simpai ti digaga bebelit ti ulih dibuka tang enti udah tebelengka endang enda ulih disambung baru enti nadai belajarka penemu muka enggau nyambung ba niang empu.

ADAT LAMA… Sida Partie serumah lebuh ngelalu petara niti ruai beserimbai enggau Gawai Antu didiri dalam taun 1990an

“Siti agi utai nyelai ditempa niang iya nya kasut getah ti suah dikena iya bejalai ke tanah, bumai enggau bemain ba ai. Niang mega kala ngaga kelita ari put sadin sereta landik ngeripei redio enggau jam,” ku Partie nambah.

Ngenang jeman Jipun menya, niang Dunging bisi nguji ngaga bilun ari kayu. Bilun tu ukai mai penumpang tang nyadika ayam. Nyadi pemanjai bilun tu bisi tiga kaki lalu suah diuji iya asuh terebai melunggang perabung rumah kami empu di Nanga Ulai. Bilun tu mega udah ulih terebai maras puchuk kayu getah lalu injin bilun tu diambi niang ari prikas injin muto ruang. Udah nya, niang mega bisi ngaga gis ari getah.

“Nyadi getah beberapa pikul laban niang Dunging tu sigi mayuh getah ti dipanduk ketegal kelalu sayauka getah nya tebasau ngapa laban nadai alai nyual maya pegai Jipun. Getah nya dipanduk dalam tong lalu kaus iya ulih terus ambi nyadika gis. Pengawa ngulihka gis baka kitai manduk arak langkau. Nyadi pengawa manduk getah nyadi gis tu enda lama dikereja iya sepengudah Jipun alah badu megai menua, gis pan datai ba menua tu.

“Siti ari utai nyelai ditengkebang iya endang dipeda mata aku empu iya nya ngaga ngeli. Seduai iya melaki bini endang bisi ngeli. Aku empu kala dianjung niang indai nyabut ngeli ngagai niang Dunging ngena puchau. Baka tau ajih.”

“Ari pemayuh utai nyelai dikereja niang, kitai meda pemagas enggau pengepuh iya ngereja pengawa. Ambika chunto, niang kala ngaga tekat ai (mini hidro) ba Sungai Ruruk, kaki bukit alai iya bumai. Tali direntang iya ngelingi umai lalu ditanchangka iya put, tali disambung ngagai tekat ai, put bemunyi 24 jam kena muru burung enggau jelu bukai.

“Bisi siti bukit ti dichangkul niang empu, bisi lima taun endur iya tembu nyangkul bukit ari kaki dataika tuchung, digaga iya baka tangga ke dipungga ngena beliung, bukit tu begigi, endur iya bumai ninting taun. Siti agi penyelai ulah niang ari kami serumah ke bukai lebuh bumai, iya nadai kala mindah berimba ba tanah bukai, mendam ba siti tegalan aja,” ku iya seraya nambah, niang Dunging kelia suah bejual getah ba Kuching.

PESAKA TUAI… Antu pala ti bisi digitang ba ruai tiga pintu ari bilik niang Dunging, meruan nyentuk diatu.

Niang Dunging tu ku Partie, endang terit amat enggau bala kuli iya tang ngena pematut mega, sida ti bekuli ba sumil ramu.

“Nitihka itung orang lebuh nya, niang Dunging senang-senang bulih untung beresi RM700 sebulan. Enti dibanding enggau kemaya hari tu duit nya enda kurang dua tauka tiga puluh kali lipat berega.

“Niang mega bisi ngaga jalai alun iya empu ari rumah stesyen iya ba Sungai Prin ngelawa Ulu Rimbas, kurang lebih sebatu pemanjai enggau 18 kaki pemesai enti ba tanah landai sereta 8 kaki pemesai ba tanah renjan.

“Iya ngaji orang nyangkul enggau gaji 10 sen sekaki besegi. Gaji orang bekuli enggau iya pemadu mayuh manggai RM6 siku sehari. Ba menua kena pansa jalai tu lalu ditanam iya getah ti ditunu ngambika ulih nyambung ngagai jalai besai perintah sereta ngerintis jalai ngagai Bukit Penajar. Nyadi jalai tu nyadi simpang lalu kenu ku ati iya, perintah lalu mayar iya laban udah ngaga simpang Ulu Rimbas ngelawa Ulu Pek,” ku Partie ngenang pemintar runding niang aki sida, Dunging.

TIRIS… Tuai Rumah Bagat (ngepit insap) begulai enggau anak menyadi niang Dunging, Wat Lanyau.

SELAMPAI KENANG… Sida Partie diri menyadi lebuh rabat niang indai sida dalam taun 1990an, niang ex-Tuai Rumah Tinggie Lanchang (kanan).