KUCHING: Urung 23 iku mujur nerima status peranak menua tu nitihka Perkara 15(A) Perlembagaaan Persekutuan ba Wisma Wanita, kemari.

Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit, Datuk Fatimah Abdullah madah sida ke nerima status tu udah lama nganti status sida dikemendarka Opis Menteri Dalam Menua (KDN).

“Laban beratika rayat bulih mayuh perengka guna ti disediaka perintah awak ulih napi pengidup ti meruan, aku ngarapka pinta ari sida peranak Sarawak patut dikemerat.

Peminta status peranak menua tu dipantaika Komiti Khas Status Peranak Menua (JKK) Sarawak ba baruh Perkara 15(A) Perlembagaan Persekutuan,” ku iya.

Fatimah madah nya lebuh pengawa Nyuaka Surat Pemendar Status Peranak Menua nitihka Perkara 15 (A) Perlembagaan Persekutuan di Wisma Wanita, kemari.

Fatimah ti mega nyadi chairman komiti nya madah pemina status peranak menua nitihka Perkara 15 (A) Perlembagaan Persekutuan tu khusus ngagai orang ti ukai peranak menua tu beumur 21 taun ke baruh aja.

“Naka tu, urung 682 iti peminta udah dikenatai ngagai KDN sekumbang JKK Sarawak udah ditumbuh kenyau taun 2016.

“Taja pia, urung 120 iti peminta tauka 63 peratus udah nerima surat pemendar ari KDN,” ku iya nambah.

Sama bisi ngulu pengawa nya Menteri Muda Orang Indu enggau Pemansang Anak Mit Rosey Yunus, Sapit Ketuai Sekretari (Polisi enggau Menua) KDN Datuk Wan Dahlan Abdul Aziz, Direktor Opis Pengerejister Bansa Sarawak Abang Noraffian Abang Haji Ibrahim sereta bala bukai.

TERIMA KASIH KDN.. Fatimah begulai enggau 10 iku sida ke datai nerima surat pemendar status peranak menua nitihka Perkara 15(A) Perlembagaan Persekutuan di Wisma Wanita, kemari.