“Entara sarak ti tau dikemendarka Kort Penghulu iya nya sarak manis, kena tinggalka laki tauka bini, tegal gila tauka sakit lan, tegal kena jil, tegal ngidap penyakit, sarak ketegal butang enggau sarak ketegal kebuah bukai. ”

SIBU: Tuju Adat Iban dikena nanggam pendiau enggau ulah begulai enggau pangan diri sama diri awakka mai penyelap, pengerai enggau pengelantang diri serumah nyengkaum adat sarak.

Nitih ku Tuai Rumah Akul Dagang ari Sungai Belalang, Salim di Sibu, ulah enggau pendiau ke manah nitihka adat ukai semina nanggam diri sebansa enda belah tauka pambar aja, tang mupuk matih pendiau ke menyana di mua Petara ngambika tau diau chelap lindap nguan menua.

“Taja pengawa sarak tu ukai pekara dikedeka kitai, tang bisi adat udah ditetap sida ke tuai dulu dikena mutarka iya nentuka kededua piak bela lantang ati sereta enda lalu mutuska kaul, kelebih agi kaul anak enggau apai indai sida ke sarak.

“Mayuh amat kes sarak udah dipechara ba Kort Bumiputera kitai, tebal agi kes tu bepun ari laya, saru penemu tauka kelalu ninding, enda seati agi, terumpang pechaya enggau mayuh pekara bukai ngujungka kaul sida puntan.

BEJALAIKA ADAT… Tuai Rumah Akul Dagang (bediri, enam kiba) begulai enggau bala bukai ti dipadu gawa megai adat ba opis Servis Sivil Sarawak.

“Entara sarak ti tau dikemendarka Kort Penghulu iya nya sarak manis, kena tinggalka laki tauka bini, tegal gila tauka sakit lan, tegal kena jil, tegal ngidap penyakit, sarak ketegal butang enggau sarak ketegal kebuah bukai.

“Dalam Undang-Undang Tikah (Marriage and Divorce Act) ke diubah baru dalam taun 1976 nadai nagang peranak asal Sarawak jadi belaki bebini enggau sarak nitihka adat asal. Nya alai, bansa Iban di menua Sarawak tau jadi belaki bebini tauka ngatur sarak sida nitihka Adat Iban,” ku iya ngelansa.

Iya ti udah dipadu mangku pengawa nyadi Assessor ba Kort Bumiputera di Sibu madah, atur sarak enggau pekara belanja anak udah ditusun baru nitihka pemansang pendiau kemaya hari.

Anak ke enda nemu utai ulu-ili ketegal apai indai udah terumpang ruang bilik patut disikap enggau belanja enggaika sida tu idup napi pemerinsa, suntuk belanja lalu keberuran enda makai.

“Ngenang pasal atur bebagi barang enggau lanting lebuh sarak. Nyadi barang ke kena bagi nya dikumbai barang lama, barang ulih begulai enggau asil ari pengawa pemansang ba ruang bilik seduai ke sarak.

PENGINGAT… Tuai Rumah Akul (tengah) begulai enggau menyadi iya, gambar dalam taun 1960-an.

“Reti barang lama tu iya nya barang ke diulih apin begulai lalu barang ulih begulai iya nya barang diulih sekumbang begulai melaki bini. Semua asil tauka pemisi diulih ari pengawa pemansang bepukuka barang lama deka dibagi bela entara diri sebilik.

“Barang dikumbai lanting diatu nyengkaum pesaka baka kebun getah tauka tanah, sekalika barang bukai ke berega baka keresa lama baka tawak, bebendai, bedil enggau ke bukai datai ari bilik lama,” ku iya ngelansa silik ti kala mangku pengawa kaunsilor.

Nangkan nya ku iya, enti orang sarak baru udah melah pinang, sekalika lelaki tauka indu enggaika pangan agi enggau nadai tentu tegal, sapa seduai muai pangan deka kena tinggang penyalah nitihka pemesai ukum di menua nya.

“Enti sema lelaki muai indu, penyalah iya besai agi ari enggi indu. Ditambah enggau ukum Perintah, iya mega dipinta mayar pemalu ngagai iya ti dibuai, nitihka pemesai adat ti selalu dikena di menua nya.

“Bisi mega sekeda lalu apin begulai, enda teantika nyundang pinang alai muai pangan, tang jarang amat utai baka tu nyadi lalu suah agi nyadi enti ati barang sapa seduai ke jadi nya endang enggai, sekalika enggai ka gamal, bisi orang bukai dikedeka tauka tegal bukai, tang alai nyadi melah pinang ari pejal apai indai.

TELADAN… Peneguh kaul sida ke tuai dulu menya patut diteladan rebak diatu, anang muntang nyarak pangan diri. Gambar diambi ari adatbansaiban.blogspot.com.

“Kebuah alai minta pemalu ngagai iya ke muai, laban tu dikumbai semina ngabas ruang bilik orang, nya kabuah apai indai napi pemalu enggau ngamahka nama sida sebilik,” ku iya.

Kelimpah ari nya, pengawa baka tu endang jai amat lalu tau dikumbai semina deka beduan, ngayah, ngasa sereta ngemalu orang aja. Suah mega apai indai iya ti dibuai minta bayar pengerugi ti udah dikena beterang tauka melah pinang.

Nya kebuah kitai bisi adat dikumbai Tunggu, jalai sida ke tuai ngemadamka laya tauka pengachau. Bisi dua Tunggu dalam ngatur sarak tu iya nya Tunggu Luya enggau Tunggu Tinggal.

Tunggu Luya tu ku iya, adat dibayar laki ke muai bini ti udah beranak siku tauka mayuh ari nya, tang anak seduai parai magang lalu Tunggu Tinggal iya nya adat dikeluarka orang ti muai bini tauka laki.

“Enti sema sarak nyau udah entara bulan entara taun taja nadai tentu tegal lempung agi mega penyalah lalu pemalu nadai dipinta apai indai lalu enti sema sarak maya nyau bisi anak lain agi mega adat iya.

LANTING… Entara keresa ti patut dibagi bela, enti sema bisi, maya adat sarak udah diputuska ketuai ti megai adat.

“Temu aku jarang orang ke sarak enti nyau udah bisi anak enti nadai tegal ti besai laban ati nyau lebih agi ngerunding anak enggau empas ngagai ruang bilik ti udah lama didiri kelimpah berundingka pemedis ngepunka idup baru,” ku iya seraya nambah, ke diatu adat Iban muai pangan kelalu lempung, nya alai orang muntang amat ngelengkaka pangan, nadai berunding panjai empas pengawa sida nya.

“Bisi mega aku nemu runding sekeda orang endang rindu mayuh rambang, laban nya manah dipeda ku anak ati sida. Kebuah alai manah ku sida laban mayuh orang deka, lalu sida ngemenangka diri tampak bebini tampak belaki.

“Pelaba aku nyangka mayuh orang setuju enggau aku ngumbai ati enggau runding ti bakanya salah bendar lalu enda tau enda diubah. Jangka aku mega, neladan sida ke tuai menya, orang ke jadi enggau jalai beterang manah ba mua apai indai enggau melah pinang lubah agi sarak enti chukup jaku, chukup aum apai indai enggau seduai ke jadi, laban ngenang pengerugi enggau pengiruh diri empu enggau kaban belayan kulu kili ti udah besaup ngemujurka pengawa sida sebilik ngatur pengerami nya.

“Nya alai enti ulih anang ngudahka diri bebini belaki laban enda lebu asai bisi pengiruh enggau pengerugi. Sida ke jadi ari bepangan, nitihka pengeran ati tebal agi sarak kelebih agi sida ke nembiak, bedau bau lia udah belaki bebini lalu apin nemu ngidupka diri ngujungka sida sarak sereta besalah pangan diri,” ku iya nangkan.

KENANG… Tuai Rumah Akul begambar ungkup kenang ba mua DUN Lama lebuh nerima pingat Ahli Bintang Kenyalang (A.B.K) taun nyin kemari.

 

TEMEGAH… Pingat Ahli Bintang Kenyalang (A.B.K) diterima Tuai Rumah Akul Dagang.