Pengelain daya idup nyadi pun penegap kaul serakup pupu bansa di Malaysia

KUCHING: Penyerakup enggau pemereti ati pupu bansa di Malaysia deka galak agi ari pengawa nerenakka pengelain daya idup ngagai raban Kolej Komuniti Kuching ditu.

Kenu ku Ketuai Program Dagang Temuai enggau Matau Menua Kolej Komuniti Kuching, Mervin Gumba Anak Sigai, penemu ti diiri ari nyereta aktiviti tau meri pemaik enggau nambahka agi semengat kerejasama ngagai bala nembiak sereta nempa rebak bepenemu, mereti sereta bebasaka pangan diri.

“Pekara ti semampai perati setipak enggau pengelandik ti dipelajar ba Kolej Komuniti Kuching bepelasarka TVET ulih mantaika pangku pengawa bala nembiak nuju graduet ti menyana, ngembuan penau ba dagang sereta sebela ba semua sukut.

“Nya kebuah bala nembiak ba Kolej Komuniti ukai semina diajar enggau belajar dalam kelas aja tang mega ba luar kelas,” ku iya rambau aum pengarang berita.

Berindik ari nya, Kolej Komuniti Kuching nengah JPPKK mega ransing merambu enggau ngatur program Sitipikit Dagang Temuai enggau Matau Menua dikena nempa nembiak ti ulih nangkup peminta industri ba bidang tu.

Kebuah pia ku iya, laban industri dagang temuai jampat amat ngerembai ti begunaka peminta orang gawa bepengelandik enggau bepenau ba bemacham pangku pengawa bekaul.

Tambah mega ku Mervin Gumba, Program Jom Berambeh Ke Malaya ti diatur kena 2 nyentuk 5 April tu deka nangkup silibus rekreasyen dagang temuai, daya idup Malaysia enggau operasyen ejensi dagang temuai.

JAKU PERANSANG… Mervin nibarka jaku peransang ngagai bala nembiak ba Balai Mayuh Guna Kolej Komuniti Kuching. – Gambar pemeri Marvin Kudang

 

BEJADI… Sapit Direktor Pengatur Pengawa, Wan Khazlina Wan Mohamed (kiba) disempulang Mervin (tengah) mangkung tawak kelai bejadika atur program seraya dikemata bala bukai. – Gambar pemeri Marvin Kudang

 

RICHAH … Tanda bansa India mega bisi dibantai bala nembiak Kolej Komuniti Kuching rambau atur pengawa Budaya Malaysia – Gambar pemeri Marvin Kudang

 

KENANG… Wan Khazlina (duduk, tengah) Mervin (duduk, kanan) Mohd Sani Azizan (duduk, kiba) begambar bebala mayuh begulai enggau bala nembiak Kolej Komuniti Kuching. – Gambar pemeri Marvin Kudang

 

Mervin (tengah) nyempulang Wan Khazlina (kanan) bejalai ngelawa bangsal mandangka pemakai asal bansa Melayu. – Gambar pemeri Marvin Kudang

 

Wan Khazlina Wan Mohamed (kanan) disempulang Mervin (kiba) ngaul ‘Yee Sang’ ba bangsal bansa China. – Gambar pemeri Marvin Kudang