Nyaga andau titi rawan ngiring semengat ngelayang ngelawa menua sebayan

“Dua iti jalai ditengah semengat orang ke udah parai iya nya nuju menua sebayan dikumbai Tinting Tatai Ninggang enggau Sungai Mandai Kepayang Banggar.”

KUCHING: Ba pengarap tuai kitai Iban kelia, burung bubut tauka suah agi dikumbai kitai bunsu bubut tu mih ngemata enggau nyaga andau titi rawan ti ngiring semengat orang ke udah parai mansang pulai ngelayang ngelawa menua sebayan.

Ku Lenggang Nuing, 48 taun, barang sapa semengat kitai ke ulih niki rumah nya, lalu ulih pulai idup baru munyi ku jerita tuai menya ditusui sida aki ini ba ruai lebuh duduk betunga maya lemai hari, jalai semengat kitai parai bisi dua iti.

“Dua iti jalai ditengah semengat orang ke udah parai iya nya nuju menua sebayan dikumbai Tinting Tatai Ninggang enggau Sungai Mandai Kepayang Banggar.

MENUA SEBAYAN… Rampa tinjau menua dikumbai Batang Mandai di Kapuas, Kalimantan Indonesia.

“Kebuah pia, sekeda semengat orang ke buyan, enggai nengah jalai tinting tatai nunggang laban takut ke ulat ngempang mesai tubuh babi bebujang.

“Tambah mega enda tan kirat nengah tegalan umai sebayan angat rangkai rangkang, pedis ari betu kena api ba dunya nyata,” ku Lenggang, peranak asal Mujok Julau.

Ku iya, baka nya mega sida ti nengah kepayang bangar, enda lekang diterutu ai siru tanjah basah ujan sayang, nyau genting pun nibong berayah alai perau sebayan sangkai nanggam ke tali perau.

“Enti kelia lebuh orang ke nurun nganjung antu, enda tau sama jalai tangga penurun, laban Sempulang Gana enggai kunsi jalai enggau orang sebayan, nangika mulut semengat orang ke tau tepang ngerara belayan padi, tau ngasuh padi balang enda nyadi.

“Nya kebuah sida ngagaka orang parai nya tangga pancha kena nurun ke tanah, maya nurunka bangkai, ai dalam genuk dipechahka orang sereta bekal empana dibuai orang ba endur nya.

BUNSU BUBUT… Burung ti ngemata enggau nyaga andau titi rawan ti dituju jalai semengat kitai ke parai mansang pulai ngelayang ngelawa menua sebayan.

“Lalu kitai ke agi idup tu enda tau makai bekal empana sebayan ku orang tu laban mali enda gayu,” ku Pemesai Waran Dua (B) Lenggang ngelansa silik. Nangkan nya ku Lenggang, andau titi rawan rumah Bunsu Bubut ngejang nengah rumah Bunsu Bubut, lalu punggang setak andau titi rawan iya nya rumah Endu Dara Gubir Dada Rinda Tusu Lanjut Melurir Aka Tuai Antu Kok Lir, lalu iya tu mih ke nusuka semengat anak mit ke parai nadai indai.

Ngejang ari nya tadi, baru semengat datai ba menua Endu Dayang Geruda Palan Dara Mati Ngejang, terang iya.

Pengudah mansa enggau ngejang ari menua nya, baru nuntung ba menua mandai Enie Beraie Ngenang. Maya tu mih orang ke benung ngulit di menua, lalu semengat orang ti parai nya ngetu ba menua mandai Enie, laban rindang bayam pupu ai ti anyut ngili ai batang mandai.

“Sida tepedaka pupu pau, pupu pakar, pupu bangkit, pupu anggit, ngerara sida iya, enda bebasa meh sida tu di menua semengat ke parai sida udah bekenaka perunsut bisi dipeda anyut meali-ali bau rengut.

“Ngejang ari menua mandai Enie baru datai di menua mandai jenuh endur rapuh karak tulang.”

PENGARAP TUAI… Burung bubut tu dikumbai burung bertutot alang-alang.

Ba penemu iya ku Lenggang, pengarap kitai Iban tuai kelia nitihka leka penggap dalam leka timang sida lembambang, nyauka sama ba dalam jalai pengarap Islam.

“Nitihka peragam aku, menua sebayan enggau batang mandai tu ti dikumbai sida dunya akhirat tauka ‘alam barzakh’, lalu titi rawan nya dikumbai sida titian sirat, burung bubut nya di kumbai sida burung ‘Bertutot Alang-Alang’.

“Ba menua mandai nya ke pengabis tauka kepenudi semengat kitai bejalai alai kitai nganti ke diangkatka petara endur semengat tetap diau, iya nya menua serega,” ku Lenggang nyimpul penemu diri lebuh dirandau Suara Sarawak.

BEKUNSI… Pemesai Waran Dua (B) Lenggang Nuing nampung jerita tuai

 

JALAI SEMENGAT… Batang Kapuas nyadi jalai nuju Batang Mandai Mati, adap Kalimantan Barat, Indonesia.

 

PESAKA MENUA… Danau Sentarum entara menua dipansa semengat orang ke parai nuju Batang Mandai.