Rayat lama udah nganti pala tanah disukat ngena Seksyen 18

KUCHING: Chairman Serakup Dayak Iban Sarawak (SADIA) Krian, Andrew Paul madahka diri berasai lantang sereta muji penetap penemu dibantaika Perintah Besai Pakatan Harapan (PH) sentang nyukat tanah Adat Bansa Asal (NCR) ngena Seksyen 18 Kanun Tanah Nengeri.

Ku Andrew, penerang nyemetak dibantaika Menteri Kereja Raya, Baru Bian ensanus ti deka ngena belanja penyampau RM21.5 juta ari penyampau bajet RM40 juta nengah Program Nyelinting Bumiputera Sarawak dikena meri pala tanah individu ba tanah NCR disukat ngena Seksyen 18.

Kebuah pia ku Andrew, Seksyen 18 tu dikedeka sereta udah lama dianti mensia mayuh kelebih agi bansa asal ti bempu menua.

“Nya alai, enti sema Perintah Sarawak setujuka penetap penemu Perintah Besai ngemeranka pengawa nyukat tanah NCR ngena Seksyen 18 endang berita chukup manah ngagai kitai bansa asal.

Andrew Paul

“Lalu pengawa tu berengkah diatur sereta chakah dipejalai belabuh ari diatu tau amat ulih ngurangka serekang penemu enggau penyarut ti udah lama nyadi entara rayat,” ku Andrew madah nyemetak.

Ku iya, enti kitai ngenang pengirau rayat, baka ti udah diperati kenyau ari taun2011, kitai meda pengawa Nyukat Tanah Kunsi Seksyen 6 enggau Nyukat Tanah Seksyen 18 tu seruran nyadi barang randau rayat.

“Nadai ngira ni genturung pendiau, kelebih agi sebelah pak kupi enggau ruai rumah panjai sereta ba media rama, balat dikejaku enda ngira malam tauka siang.

“Nya alai, ari utai ke nyadi tu, kitai patut ulih nemu reti pengawa Nyukat Tanah Section 18 tu chukup besai reti sereta enda nyalah tau disempama baka tubuh enggau semengat kitai, pengidup kitai, kelebih agi bansa asal.

“Berindik ari nya kami ari raban NGO minta sereta andal amat penetap penemu Peringtah Besai tu deka ngena manah belanja RM21.5 juta tu nyukat Tanah Seksyen 18 ulih diterima sereta dipejalaika Perintah Sarawak, ngelui ari pemerat politik,” tandu iya.

Reti nya ku Andrew, pemutus enggau penetap penemu digaga Perintah Besai enggau Perintah Sarawak ti sepenemu ketegal berundingka pengelantang rayat enggau pemaik menua, ngiarka penemu politik ke tisi dulu.

“Ba penemu aku empu, enti kitai bisi agih belanja ti diterima ari Perintah Besai lalu dikena nyukat tanah nitihka seksyen ti patut, tu ulih mutarka penyarut enggau penemu pambar entara peranak enggau raban bekaul ngelama tu sereta ulih ngemai pengelantang ngagai semua peranak asal di menua tu.

Andrew mega madahka diri andal amat raban PKR Sarawak ulih ngena manah belanja ari Program Nyelinting Bumiputera Sarawak dikena nangkup peminta enggau peneka rayat ditu.