KUCHING: Perintah Sarawak ngagihka geran penyampau RM11 juta dikena mantu Sekula Primari Bansa China (SJKC) Sarawak ungkup taun tu.

Ari penyampau nya, sepenyampau RM8 juta ungkup sekula China Sarawak seraya RM3 juta agi ungkup belanja mindahka baru SJK Chung Hua Bako.

Kepala Menteri Datuk Patinggi Abang Johari Tun Openg lebuh ngemendarka bantu nya madah, geran sekula China taun tu ngaul belanja tambah penyampau RM1 juta ari RM7 juta ti diagih taun nyin tadi.

“Tu puku ti patut diberi kitai ngagai komuniti nentuka bala anak ulih mansang enggau nyingkang sebaka enggau ubah jeman,” ku iya.

Iya mansutka jaku nya rambau Pengerami Makai Taun Ke-35 Serakup Kaunsil Pengatur Sekula Primari Bantu China Bagi Menua Kuching, Samarahan enggau Serian (Tunglian) sereta Ngiga Belanja Mindahka Baru SJK Chung Hua Bako di Dewan Alumni SJK Chung Hua No.3 ditu, malam ensanus.

Abang Johari

Sama datai Menteri Pelajar, Sains enggau Pansik Teknologi Dato Sri Michael Manyin Jawong, Menteri Kaunsil Kandang Menua enggau Pengawa Berumah Datuk Dr Sim Kui Hian sereta Presiden Tunglian Jonathan Chai Voon Tok.

Seraya belanja mindahka baru SJK Chung Hua Bako ke Taman Berlian, Kota Samarahan, nangkup peminta belanja penyampau RM6 juta dikena bejalaika projek nya.

Pemeri nya ari Abang Johari ti mega nyadi semaya iya ngagai Serakup Tunglian iya nya nitihka asil belanja diulih sida sepenyampau RM3 juta.

“Pengawa mindahka SJK Chung Hua Bako ke taba baru ulih dipejalai laban belanja udah chukup.

“Kami mantu semua sekula enggau nadai bechiping, sekalika sekula perintah, sekula mission tauka sekula China,” ku iya.

Serakup Tunglian ngarika kaunsil pengatur pengawa 56 buah Sekula Primari Bantu China (SJK Chung Hua) di Bagi Menua Kuching, Samarahan enggau Serian.

Ba taun 2019, sepenyampau 18,039 iku nembiak rejista belajar ba sekula tu, ke alai lebih ari 25 peratus tauka 4,592 bumiputera.

Sekeda kaban sekula di kandang menua pesisir mega bisi 80 peratus nembiak bumiputera dibida nembiak China.