Nembiak lepas SPM-STPM ulih betanya, nemu penerang silik pasal UiTM

KOTA SAMARAHAN: Urung 2,000 iku nembiak ditagit deka nampung pelajar ba Universiti Teknologi MARA (UiTM) nengah Ekspo Sesingkang ke UiTM (ESKU), ku Sapit Rektor Pekara Nembiak, Dr Isa Mohaddin.

Ku Isa, ekspo tu nerima penatai nembiak lepas peresa Sijil Peperiksaan Malaysia (SPM) enggau Sijil Tinggi Persekolahan Malaysia (STPM) ti bisi ati nampung pelajar sida ba UiTM.

“Ba ekspo tu, 26 bengkah palan mandang udah disedia ungkup nembiak lepas SPM enggau STPM ti deka nganjung peminta nampung pelajar ba UiTM.

“Sida tu deka berengkah belajar dalam bulan September taun tu, lalu sida ke nganjung peminta nengah sistem UPU, berengkah bulan Mac,” ku iya.

Isa mansutka jaku tu pengudah bejadika Ekspo Sesingkang ke UiTM 2019 di Dewan Jubli UiTM Kampus Samarahan, kemari.

Nengah eskpo tu, bala nembiak ulih minta piak fakulti meri ajar sereta nunjuk chara ngisi peminta nampung pelajar ba UiTM.

“Tu siti ari chara UiTM dikelala nyadi sebuah palan pelajar tinggi ti manah endur nampung pelajar ba tikas diploma nyentuk PhD.

“Kami mega nagit urung 15,000 iku ukai semina didedat raban nembiak aja, tang ngandalka penatai mensia mayuh meda pengawa ke bisi diatur,” ku iya.

Kelimpah ari nya, sebengkah palan mega udah dipilih alai ngatur ESKU Pampang Sarawak iya nya di Mukah, Sibu, Miri enggau Bintulu berengkah ari 23 Mac tu tadi.

DIPEBASA… Isa nerima basa bejadika Ekspo Sesingkang ke UiTM di Dewan Jubli, Kampus Samarahan, kemari.

 

UNGUP PENGERAI… Isa benung beperesa pengerai ba palan mandang Fakulti Sains Pengerai.

 

GAGIT… Siku nembiak benung kiruh ngisi pom rejista.