KUCHING: Pengawa numbuhka e-dagang ulih nambah penatai pemisi sida ke bedagang.

Menteri Muda E-Dagang ti mega Menteri Muda Pemansang Dagang Mit enggau Jelan Pemesai (PKS) Datuk Mohd Naroden Majais madah, pemisi sambung makit besai ungkup e-dagang ti nadai sekat, deras sereta puku mit.

“E-dagang tu mega ulih meransang pengawa bejual bebeli nengah online.

“Tu mega datai ari peminta mensia mayuh laban ulih ngelimat jam, macham bansa barang enggau rega ti patut sereta ulih dikereja sebarang maya,” ku Naroden.

Teks jaku iya dibacha Ketuai Penulung Sekretari Opis Menteri Dagang Entarabansa enggau E-Dagang, Lester Mathew lebuh bejadika chap dagang baru pelasar e-dagang (BeGO) di iCube Innovation, ICOM Square, kemari.

Ku Naroden, di Malaysia e-dagang tu nerima nimbal chukup manah seriris enggau pengawa bekenaka internet ti manggai 15.3 juta lalu disadang deka majak nambah.

“Pemansang ekonomi digital tu disukung aplikasyen teknologi pemadah enggau arus penyambung (ICT).
“Pengawa bekaul ekonomi ulih dipejalai enggau jampat sereta rembus ngagai menua bukai,” ku iya.

Naroden ngarapka BeGO ulih nyadi pelasar e-dagang ba udal enggau servis online ti besai di Sarawak sereta ngemesaika bungkur servis sida ngagai renggat nasional enggau enterabansa.

KENANG… Lester (tiga ari kanan) begulai enggau bala bukai lebuhg ngulu pengawa bejadi chap dagang baru pelasar e-dagang (BeGO) di iCube Innovation, ICOM Square, kemari.