Ubah draf Konstitusyen Perintah Besai

KUCHING: Bala Kaban Parlimen (MP) GPS patut diberi ubah draf Konstitusyen Perintah Besai enggau jampat, ku Ketuai Infomasyen Parti Pesaka Bumiputera Bersatu (PBB) Sarawak, Datuk Idris Buang.

Kebuah pia ku Idris, ngambika bala MP ngembuan awak ti chukup beratika ubah nya sebedau mantaika Rang Undang-Undang ke diperambu Kabinet Perintah Besai.

“Tu beguna endar ngambika bala MP ulih berati enti sema ubah nya sekalika bisi ditambah, diksurang, kelebih agi ubah ba Konstitusyen Perintah Besai laban Sarawak bisi bagi ba Sempekat Malaysia.

“Mayuh pekara bukai dalam Sempekat Malaysia (nyengkaum Perambu IGC) sereta pekara ba konstitusyen nya empu agi dalam perambu Komiti Pemandu enggau Teknikal sereta apin teputar enggau meruan,” ku iya madah rambau aum pengarang berita.

Pia mega ku Idris, bisi pekara ti nadai jaku pemutus tang begunaka atur kena mutarka penanggul nya baka status nama menua tu, hak pemansut asal menua nyengkaum gis enggau minyak, pelantar minyak enggau ke bukai.

“Aku ngasaika bala MP kitai patut ngena pemintar runding enggau kuasa mansutka penemu sida ba Rang Undang-Undang ngambika kitai tau bulih hak ti patut nengah undang-undang, MA63 enggau Konstitusyen.

“Rayat meseti ingat, bisi tauka nadai ubah Perkara 1 (2) Konstitusyen Perintah Besai, hak sereta status Sarawak udah nyadi tiang pemun MA63,” ku Idris.

Nadai ubah ba Konstitusyen Perintah Besai ti ulih ngubah nya laban nya siti sempekat ke udah lama dijapai entara menua United Kingdom, Sarawak, Sabah enggau Singapore kelia, ku iya nambah.